2026 jylǵy maýsymdaǵy Qazaqstannyń eń qymbat fýtbolshylary: reıtıng jańartyldy
ASTANA. KAZINFORM — AQSh, Kanada jáne Meksıkada fýtboldan álem chempıonaty ótip jatqanymen, álemniń ózge elderinde fýtbol ómiri toqtaǵan joq. Belgili saraptamalyq agenttikter oıynshylardyń transferlik qunyn jańartyp, Qazaqstan fýtbolshylarynyń da jańa reıtıngin jarııalady, dep habarlaıdy Kazinform tilshisi.
2026 jylǵy 19 maýsymdaǵy Transfermarkt portalynyń sońǵy jańartýyna sáıkes, Qazaqstannyń eń qymbat fýtbolshylary — «Ahmat» klýbynda óner kórsetetin Maksım Samorodov pen almatylyq «Qaırattyń» 17 jastaǵy shabýylshysy Dastan Sátpaev. Eki oıynshynyń da naryqtyq quny 3 mıllıon eýroǵa baǵalanyp otyr.
Maýsym aıyndaǵy jańartýdyń basty ereksheligi — Maksım Samorodovtyń transferlik qunynyń 500 myń eýroǵa ósýi boldy. Sonyń arqasynda ol reıtıng kóshin bastap turǵan Dastan Sátpaevpen teńesti.
Al burynǵy jyldary qazaqstandyq fýtboldaǵy eń qymbat oıynshylar qatarynda bolǵan birqatar fýtbolshylardyń baǵasy tómendedi.
«Qaırattyń» 17 jastaǵy shabýylshysy Dastan Sátpaev sońǵy bir jyl ishinde transferlik qunyn aıtarlyqtaı arttyryp, el fýtbolynyń eń qundy oıynshylarynyń birine aınaldy.
Jaqynda máskeýlik «Dınamo» klýbyna aýysqan 28 jastaǵy Baqtıer Zaınýtdınov jaraqattar men oıyn deńgeıiniń tómendeýine baılanysty qunyn joǵaltyp, 2,5 mıllıon eýroǵa deıin arzandady. Bul — onyń sońǵy jyldardaǵy eń tómengi kórsetkishi.
Sondaı-aq Sankt-Peterbýrgtiń «Zenıt» klýbynyń qorǵaýshysy Nuraly Áliptiń de naryqtyq baǵasy 500 myń eýroǵa tómendep, 2 mıllıon eýrony qurady.
Transfermarkt nusqasy boıynsha 2026 jyldyń maýsymyndaǵy eń qymbat qazaqstandyq fýtbolshylar:
- Maksım Samorodov («Ahmat») — 3 mln eýro (oń qanat shabýylshysy).
- Dastan Sátpaev («Qaırat») — 3 mln eýro (ortalyq shabýylshy).
- Baqtıer Zaınýtdınov («Dınamo» Máskeý) — 2,5 mln eýro (sol jaq jáne ortalyq qorǵaýshy).
- Nuraly Álip («Zenıt») — 2 mln eýro (ortalyq qorǵaýshy).
- Islam Chesnokov («Harts») — 1,2 mln eýro (oń qanat shabýylshysy).
Balamaly reıtıng
Fýtbolshylardyń transferlik qunyn baǵalaýmen tek Transfermarkt qana emes, sondaı-aq CIES Football Observatory sarapshylary da aınalysady. Transfermarkt oıynshylardyń naryqtyq qunyn sarapshylar pikiri men suranysqa súıene otyryp baǵalasa, CIES fýtbolshyny qarjylyq aktıv retinde qarastyrady.
CIES ádistemesine sáıkes, qazaqstandyq oıynshynyń joǵary qunǵa ıe bolýy úshin onyń jasy 21-den aspaýy jáne klýbymen keminde úsh-tórt jyldyq uzaqmerzimdi kelisimsharty bolýy qajet. Mundaı jaǵdaıda klýb fýtbolshyny arzan baǵaǵa jiberýge múddeli bolmaıdy.
CIES Football Observatory algorıtmderine súıensek, qazaqstandyq fýtbolshylardyń quny jónindegi reıtıng Transfermarkt usynǵan tizimnen aıtarlyqtaı erekshelenedi.
CIES modeli kelisimsharttyń merzimine, oıynshynyń jasyna, chempıonattyń ekonomıkalyq turaqtylyǵyna jáne yqtımal satyp alýshy klýbtyń mártebesine basymdyq beredi. Sondyqtan Qazaqstan fýtbolynyń negizgi aktıvteri bul reıtıngte ózgeshe ornalasady.
2026 jylǵy maýsymdaǵy jańartýlardyń basty qorytyndysy — Dastan Sátpaev Qazaqstannyń eń qymbat ári eń perspektıvaly fýtbolshysy retinde aıqyn kósh bastap tur. Al kelisimshartynyń aıaqtalýyna az ýaqyt qalǵan nemese turaqsyz lıgalarda óner kórsetetin oıynshylardyń naryqtyq baǵasy edáýir tómendegen.
CIES nusqasy boıynsha 2026 jylǵy maýsymdaǵy eń qymbat qazaqstandyq fýtbolshylar
Dastan Sátpaev («Qaırat») — 7,5 mln eýro
CIES baǵalaýynsha, uzaqmerzimdi kelisimsharty bar jas shabýylshy oıynshylardyń quny aıtarlyqtaı joǵary bolady. Mundaı fýtbolshylarǵa «bolashaq áleýeti úshin ústeme baǵa» qosylady. Osy faktor Dastan Satpaevtyń reıtıngte kósh bastaýyna múmkindik berip otyr. (Dál osy qaǵıdattyń arqasynda Lamın ıAmal CIES nusqasy boıynsha 358 mıllıon eýro kórsetkishimen álemdik reıtıngtiń kóshin bastap tur).
Maksım Samorodov («Ahmat») — 4,2 mln eýro
Reseı Premer-lıgasyndaǵy turaqty oıyn tájirıbesi men «Ahmatpen» jasalǵan uzaqmerzimdi kelisimshart onyń naryqtyq qunyn arttyryp, CIES reıtınginde joǵary orynǵa shyǵýyna yqpal etti.
Nuraly Álip («Zenıt») — 1,8 mln eýro
«Zenıt» sekildi jetekshi klýbta óner kórsetkenine qaramastan, ortalyq qorǵaýshy pozıtsııasy, jasynyń fýtboldaǵy shyń kezeńine jaqyndaýy jáne uzaqmerzimdi jańa kelisimsharttyń bolmaýy onyń transferlik qunynyń tómendeýine áser etken.
Islam Chesnokov («Harts») — shamamen 1,5 mln eýro
Shotlandııa Premer-lıgasy CIES júıesinde joǵary baǵalanatyn chempıonattardyń biri sanalady. Uzaqmerzimdi kelisimshart pen bedeldi lıgada oınaýy Islam Chesnokovtyń qunyn turaqty deńgeıde saqtap otyr.
Baqtıer Zaınýtdınov («Dınamo» Máskeý) — shamamen 1,1 mln eýro
CIES algorıtmi boıynsha Zaınýtdınovtyń baǵasy aıtarlyqtaı tómendegen. Buǵan jıi alǵan jaraqattary, alańdaǵy oıyn ýaqytynyń azaıýy jáne máskeýlik klýbpen kelisimshart merziminiń qysqarýy áser etken. Sonyń saldarynan onyń matematıkalyq naryqtyq quny Transfermarkt baǵalaýymen salystyrǵanda shamamen 2,5 ese tómen bolyp otyr.
Al álemdik fýtboldaǵy jaǵdaı qandaı?
2026 jylǵy 19 maýsymdaǵy jaǵdaı boıynsha, bedeldi Transfermarkt portalynyń sońǵy jańartýyna sáıkes, álemdegi eń qymbat fýtbolshylar qatarynda ıspanııalyq Lamın ıAmal («Barselona») men norvegııalyq Erlıng Holand («Manchester Sıtı») kósh bastap tur. Eki oıynshynyń da naryqtyq quny rekordtyq 200 mıllıon eýroǵa baǵalanǵan.
Maýsym aıyndaǵy jańartýlardaǵy eń eleýli ózgeristerdiń biri — frantsııalyq Kılıan Mbappe («Real») qunynyń tómendeýi boldy. Madrıd klýbyndaǵy maýsymnyń sátsiz ótýine baılanysty onyń transferlik baǵasy 180 mıllıon eýroǵa deıin túsip, reıtıngte úshinshi orynǵa syrǵydy.
Sonymen qatar portýgalııalyq talanttar Vıtınıa men Joaý Nevesh eń úlken ósim kórsetip, árqaısysynyń quny 140 mıllıon eýroǵa jetip, álemniń úzdik on fýtbolshysynyń qataryna endi.
Al CIES Football Observatory reıtınginde jaǵdaı ózgeshe. Oıynshylardyń jasyn, kelisimshart merzimin jáne naryqtyq áleýetin eskeretin bul júıe boıynsha Lamın ıAmal aıqyn kósh bastap tur. Sarapshylar onyń transferlik qunyn 358,1 mıllıon eýro dep baǵalap, álemdegi eń qymbat fýtbolshy retinde tanydy.
Aıta keteıik, buǵan deıin qazaqstandyqtar 2026 jylǵy fýtboldan álem chempıonatynda kimge jankúıer bolatynyn jazǵanbyz.
