2026 jylǵy qysqy Olımpıadaǵa qalaı bılet satyp alýǵa bolady
ASTANA. KAZINFORM – Italııada ótetin 2026 jylǵy qysqy Olımpıada oıyndarynyń bastalýyna 50 kúnnen az ýaqyt qaldy. Dúbirli doda 6-22 aqpan aralyǵynda ótedi. Osy rette jarystardy trıbýnadan tamashalaýdy josparlap otyrǵan jankúıerlerge arnap Olympic.kz arnaıy nusqaýlyq ázirledi.
Bıletterdi satý tártibi
2026 jylǵy qysqy Olımpıada oıyndaryna bıletter tek tsıfrlyq formatta satylady. Uıymdastyrý komıteti bıletterdi taratatyn jalǵyz resmı arnalar – Olımpıada oıyndarynyń resmı bılet platformasy men Halyqaralyq Olımpıadalyq komıtetiniń resmı seriktesi On Location saıty ekenin atap ótti.
Bıletterdi basqa da qyzmet kórsetý ortalyǵynan nemese jeke deldaldar arqyly satyp alý jarystarǵa kirýge kepildik bermeıdi jáne arenalarǵa kirgizbeý qaýpin týdyrady. Sondyqtan beıresmı jolmen bılet alýdan bas tartqan jón.
Bıletterdi qaıdan jáne qalaı satyp alýǵa bolady
Jekelegen sporttyq sessııalar men saltanatty rásimderge arnalǵan bıletter Olımpıada oıyndarynyń resmı bılet saıtynda satylady. Al bılet pen qosymsha qyzmetterdi qamtıtyn paketter tek On Location arqyly usynylady. Basqa avtorızatsııalanǵan platformalar joq.
Satyp alý úshin mindetti túrde tirkeýden ótý qajet. Satylymnyń alǵashqy kezeńinde suranysqa ıe bıletterge qol jetkizý lotereıa júıesi arqyly júzege asyp, jeńimpazdarǵa 48 saǵattyq satyp alý múmkindigi berildi. 2025 jyldyń kókteminen bastap bıletter ashyq satylymǵa shyqty. Paralımpıada oıyndaryna bıletter bólek satylady. Sondaı-aq olardyń baǵasy aıtarlyqtaı tómen.
Bılet baǵalary
Oıyndardyń baǵa saıasaty barynsha keń aýdıtorııaǵa baǵyttalǵan. Eń arzan bıletterdiń quny – 30 eýro, bul baǵaǵa hokkeı týrnıriniń irikteý matchtaryn kórýge bolady. Barlyq bılettiń 20 paıyzdan astamy 40 eýroǵa deıin, al 57 paıyzy 100 eýroǵa deıin baǵalanady.
Eń qoljetimdi sport túrleriniń qatarynda:
– kerlıng – 40-150 eýro,
– bıatlon – 50-200 eýro,
– taý shańǵysy – 100-220 eýro.
Short-trekke bıletter 150-450 eýro bolsa, konkımen júgirý sportyn tamashalaý quny 180-280 eýro turady. Kóp kórermen jınalatyn sport túrleri – frıstaıl men snoýbord. Kirý baǵasy – 50-440 eýro aralyǵynda.
Mánerlep syrǵanaý eń qymbat sport túrleriniń qataryna kiredi. Bıletterdiń quny C sanaty úshin 280 eýrodan bastalyp, gala-kórsetilimde A sanatyndaǵy oryndar 1 200 eýroǵa deıin jetedi. Negizgi jarys sessııalarynda A sanaty – 650-750 eýro, B sanaty – 450-550 eýro.
Hokkeı týrnıri eń keń baǵa aýqymyna ıe. Іrikteý matchtary 30 eýrodan bastalsa, jartylaı fınaldar men qola júlde úshin ótetin oıyndardy tamashalaý quny 200-500 eýro turady. Erler arasyndaǵy fınalǵa bıletter 450-1 400 eýro aralyǵynda satylady.
Mılan qalasyndaǵy «San-Sıro» stadıonynda ótetin ashylý saltanatynyń bıletteri 260-2 026 eýro, al Verona arenasyndaǵy jabylý rásimi 950-2 900 eýro shamasynda baǵalanady.
Bılet túrleri men oryn sanattary
Bıletter jarys kúnine emes, jekelegen sessııalarǵa satylady. Kóptegen is-sharada birneshe oryn sanaty bar.
A sanaty – eń jaqsy kórinis pen eń joǵary baǵa,
B sanaty – baǵa men sapanyń ońtaıly úılesimi,
C jáne D sanattary – eń qoljetimdi, ádette joǵarǵy qabattarda nemese buryshtyq sektorlarda ornalasady. Keıbir sport túrlerinde oryn bekitilmegen bıletter qarastyrylǵan, bul olardyń baǵasyn tómendetedi.
Bıletter formaty jáne arenalarǵa kirý
Barlyq bılet tek tsıfrlyq formatta beriledi. Jarystarǵa kirý Milano Cortina 2026 mobıldi qosymshasy arqyly júzege asady. Qosymsha 2025 jyldyń sońynda qoljetimdi bolady. Kirýge arnalǵan QR-kod sessııa bastalýyna 24 saǵat qalǵanda belsendirilip, bılet ıesiniń atyna tirkeledi. Qaǵaz bıletter qarastyrylmaǵan.
Satyp alýǵa baılanysty shekteýler
Tirkelgen árbir paıdalanýshy satylymnyń barlyq kezeńinde bir akkaýntqa eń kóbi 25 bılet qana satyp ala alady. Bir tranzaktsııada 10 bıletten artyq alýǵa bolmaıdy. Al ashylý jáne jabylý saltanattary sııaqty aýqymdy is-sharalar men keıbir sport túrleri úshin bir akkaýntqa 4 bıletten artyq satyp alýǵa ruqsat berilmeıdi. Bıletterdi 16 jastan asqan tulǵalar satyp ala alady. 14 jasqa deıingi balalar 18 jastan asqan eresek adammen birge kiredi. Sondaı-aq 4 jastan asqan ár balaǵa jeke bılet qajet.
Bıletterdi qaıta satý
2025 jyldyń jeltoqsan aıynda bıletterdi qaıta satýǵa arnalǵan resmı platforma iske qosylady. Bul – jospar ózgergen jaǵdaıda bıletti zańdy ári qaýipsiz túrde ótkizýdiń jalǵyz joly. Bıletter belgilengen baǵamen satylady jáne platforma qyzmeti úshin shamamen 5% komıssııa alynady.
On Location qonaqjaılylyq paketteri
Qonaqjaılylyq baǵdarlamasy joǵary deńgeıdegi qyzmet kórsetý men suranysqa ıe jarystarǵa kepildendirilgen qoljetimdilikti qalaıtyn jankúıerlerge arnalǵan. Paketterdiń quny 150 eýrodan bastalyp, fınaldar men saltanatty rásimder úshin ornalastyrý men transferdi qamtyǵan jaǵdaıda 10 myń eýrodan asyp ketýi múmkin.
Paket túrine qaraı onyń quramyna belgili bir sanattaǵy bıletter, basty kireberis, keıterıng usynylatyn laýndj-aımaqtarǵa qoljetimdilik, al premıým nusqalarda qonaqúı men kólik qyzmeti kiredi.
Uıymdastyrýshylardyń aıtýynsha, qarapaıym bılet sporttyq jarysty tamashalap, saparyn óz betinshe josparlaýdy qalaıtyn jankúıerlerge arnalǵan. Al qonaqjaılylyq paketteri fınaldar, saltanatty rásimder, birlesken toptar, jaılylyq pen kepildendirilgen qoljetimdilikti joǵary qoıatyn kórermen úshin tıimdi sheshim bolady.
Eske sala keteıik, buǵan deıin konkımen júgirýden qysqy Olımpıadaǵa Qazaqstan quramasynan kimder qatysatynyn jazǵanbyz.