2026 jylǵy qysqy Olımpıada baǵdarlamasynda qandaı ózgerister bar
ASTANA. KAZINFORM - 2026 jyly Italııanyń Mılan men Kortına-d’Ampetstso qalalarynda ótetin qysqy Olımpıada oıyndarynyń jarystar baǵdarlamasynda birqatar ózgerister negizilgen.
Bedeldi báseke olımpıadalyq qozǵalys tarıhyndaǵy erekshe jáne jańashyl báseke retinde aıqyndalyp otyr. Onda jarys baǵdarlamasyna birneshe jańa dıstspılına qosylǵan.
Qazaqstan Ulttyq Olımpıada komıtetiniń habarlaýynsha, dúbirli dodaǵa qatysty baǵdarlamanyń naqty nusqasy 2023 jyldyń 20 maýsymynda jarııalanǵan. Onda barlyǵy 116 júlde jıyntyǵy sarapqa salynady dep josparlanyp otyr. Bul 2022 jylǵy Beıjiń Olımpıadasynan 7 medalǵa artyq.
Jarys baǵdarlamasyna alǵash ret skı-alpınızm saıysy engizilgen. Mamandar ony tabıǵattyń sulýlyǵymen tildesýge múmkindik beretin, adrenalınge toly ári tózimdilikti talap etetin erekshe sport túri retinde baǵalaıdy. Olımpıada aıasynda jarystar erler men áıelder sprınti, aralas estafeta sekildi úsh baǵyt boıynsha ótedi.
Odan bólek, basqa da sport túrlerinde birneshe dıstsıplına qosylyp, ózgerister engizildi. Atap aıtqanda, olar frıstaıda erler men áıelder arasyndaǵy paralleldi mogýl, shana sportynda áıelder arasyndaǵy qossaıysta jasalǵan Sondaı-aq shańǵymen tuǵyrdan sekirýde áıelder arasyndaǵy saıysta da bıik tuǵyr paıdalanylady. Skeletonda aralas komandalyq jarys ótkiziledi..Al jarys baǵdarlamasynan taý shańǵy sportyndaǵy paralleldi alyp slalomdaǵy aralas komandalyq báseke alynyp tastaldy.
Buǵan qosa, birqatar sport túrinde formattyq ózgerister engizildi. Mysaly, shańǵy jarysynda qashyqtyqtar erler men áıelder úshin birdeı bolady (10 shaqyrym - jekeleı saıys, 20 shaqyrym - skıatlon, 50 shaqyrym - mass-start, 4×7,5 shaqyrym - estafeta). Bul bastama sportshylarǵa teń jaǵdaı jasaýǵa jáne olarǵa birdeı jarys múmkindigin usynýǵa baǵyttalǵan.
Al shańǵymen tuǵyrdan sekirýde erler arasyndaǵy komandalyq saıysta «Super Team» formaty qosyldy. ıAǵnı, eki qatysýshydan quralǵan komanda júlde úshin synǵa túsedi. Sonymen qatar áıelder de bıik tuǵyrdan sekiretin bolady.
Shańǵy qossaıysyndaǵy erler arasyndaǵy komandalyq jarys (bıik tuǵyr + komandalyq sprınt 2×7,5 shaqyrym) buryn tórt qatysýshydan quralsa, endi tek eki sportshy qatysatyn formatqa aýystyryldy.
Taý shańǵy sporty: jekeleı kombınatsııalyq jarystar komandalyq formatqa aýystyryldy. Endi eki qatysýshydan quralǵan komandalar baq synaıdy.
Shana sporty: aralas estafetada tórt qatysýshynyń ornyna, ár komandada alty qatysýshy bolady (úsh er, úsh áıel). Bul ózgerister genderlik teńdikti nyǵaıtýǵa, sport túrlerin jańartýǵa jáne jańa aýdıtorııany tartýǵa baǵyttalǵan.
XXV Qysqy Olımpıada oıyndary 6-22 aqpan aralyǵynda Italııanyń Mılan jáne Kortına-D'Ampetstso qalalarynda ótedi. Jarysqa 93 elden 3 myńǵa jýyq sportshy qatysady dep kútilýde.
QR Týrızm jáne sport mınıstri Erbol Myrzabosynov Úkimet otyrysynda bergen esebinde ulttyq qurama sporttyń 10 túrinen 58 medal jıyntyǵy boıynsha baq synaıtynyn atap ótti. Olardyń qatarynda bıatlon, konkımen júgirý, mánerlep syrǵanaý, short-trek, taý shańǵy sporty, shańǵy qossaıysy, shańǵy jarystary, shańǵymen tramplınnen sekirý, frıstaıl-mogýl jáne frıstaıl-akrobatıka bar.
Boljamǵa sáıkes, ulttyq qurama sapynda 35-ke jýyq sportshy bolady dep kútilýde. 2022 jyly Beıjińde ótken qysqy Olımpıada oıyndarynda elimizdiń namysyn 34 sportshy qorǵaǵan edi.