2026 jyldan áseri kúshti preparattardyń zańsyz aınalymyna jaza kúsheıtiledi
ASTANA. KAZINFORM — QR Densaýlyq saqtaý mınıstrligi áseri kúshti preparattardy satýǵa qatysty baqylaý máselesine túsinik berdi.
- QR DSM Medıtsınalyq jáne farmatsevtıkalyq baqylaý komıtetiniń derekterine sáıkes, adamnyń ómiri men densaýlyǵyna zııandy áserin tıgizetin, kúshti áser etetin zattardyń tizimine 94 ataý engizilgen (QR Densaýlyq saqtaý mınıstriniń 2023 jylǵy 26 maýsymdaǵy №120 buıryǵy). Tropıkamıd pen pregabalın dárilik zattary (saýda ataýy – «Lırıka») osy tizimge qosyldy, sondyqtan olar tek retsept arqyly satylady. Retsept jazý men dárihanalardan bosatý tártibi QR DSM-niń 2020 jylǵy 2 qazandaǵy «Retseptterdi jazyp berý, esepke alý jáne saqtaý qaǵıdalaryn bekitý týraly» buıryǵymen retteledi, - delingen Densaýlyq saqtaý mınıstrliginiń Kazinform agenttigine bergen jaýabynda.
Sonymen qatar, QR DSM Medıtsınalyq jáne farmatsevtıkalyq baqylaý komıtetiniń aýmaqtyq departamentteri tarapynan 2024 jyly retseptsiz bosatylǵan tropıkamıd, zopıklon, rýbýfın dárileri boıynsha júrgizilgen baqylaý sharalary barysynda 32 ákimshilik hattama toltyrylyp, jalpy somasy 8,9 mln teńge aıyppul salyndy.
- 2025 jylǵy 2 qańtardaǵy №150-VIII QR Zańyna sáıkes, 2026 jylǵy 1 qańtardan bastap kúshti áser etetin zattardyń zańsyz aınalymy jáne olarmen jumys isteý erejelerin buzǵany úshin qylmystyq jaýapkershilik engiziledi, - dep atalyp ótken vedomstvo aqparatynda.
Aıta keteıik, 2024 jylǵy 1 shildeden bastap Qazaqstanda dárilik zattardy, sonyń ishinde esirtki jáne kúshti áser etetin preparattardy («tramadol», «tropıkamıd», «zopıklon») mindetti tańbalaý jáne qadaǵalaý engizildi. Bul júıe aımaqtar, medıtsına jáne dárihana uıymdary boıynsha aı saıyn monıtorıng júrgizýge múmkindik beredi.
Eske salsaq, jaqynda Іshki ister mınıstrligi nashaqorlar tutynatyn dárihanadaǵy preparattar satylymyn baqylaýǵa alý máselesin kótergen edi.