2026 jylǵy álem chempıonatynyń bıletterine suranys tym joǵary – FIFA
ASTANA. KAZINFORM – FIFA 2026 jylǵy álem chempıonaty bıletterine rekordtyq 500 mıllıonnan astam ótinim túskenin jarııalady. Ótinim berý kezeńi bir aıǵa sozyldy, dep habarlaıdy The Athletic.
FIFA 104 matchtyń árqaısysy úshin jerebe tartý rásimin ótkizedi. Aqpan aıynda tańdalǵan qatysýshylarǵa bılet taratylady. Bul sheshim byltyr qazan jáne qarasha aılarynda shamamen 2 mıllıon bılet satylyp, týrnırge 4-5 mıllıon bılet qalǵan soń qabyldandy.
Toptyq kezeńnen fınalǵa deıingi barlyq oıynnyń bıletteri burynǵy álem chempıonattaryna qaraǵanda birneshe ese qymbat bolady. Bul – Soltústik Amerıka men sheteldegi keıbir jankúıerlerdiń týrnırdi teledıdardan kóretinine tikeleı baılanysty. Sondaı-aq 500 mıllıonnan astam ótinim arasynda bıletti erterek satyp alyp, ony qaıta satýdy josparlap otyrǵandary da bar bolýy múmkin.
FIFA jerebe nátıjeleri týraly jankúıerlerdi 5 aqpannan bastap habardar etedi. Al týrnır 11 maýsymda Mehıko qalasynda bastalyp, qalǵan 104 match AQSh, Kanada jáne Meksıkanyń 16 qalasynda ótedi.
Buǵan deıin fınaldyq oıyn AQSh-tyń Nıý-Djersı shtatynda ótetini habarlanǵan edi.
