2026 jylǵy álem chempıonatynda kórermenniń kózaıymyna aınalýy múmkin oıynshylar kimder

Álemdik dodada kópshiliktiń nazary tájirıbeli juldyzdarǵa aýatyny anyq. Degenmen, búginde klýbtyq jáne halyqaralyq deńgeıde óz áleýetin dáleldep úlgergen jas fýtbolshylar da týrnırdiń basty jańalyqtarynyń birine aınalýy múmkin. Osyǵan baılanysty Kazinform agenttigi 2026 jylǵy álem chempıonatynda erekshe nazar aýdarýǵa turarlyq 15 jas oıynshynyń tizimin usynady. 

1. Lamın ıAmal (Ispanııa)

«Barselonanyń» jas vıngeri búginde Ispanııa quramasynyń eń qaýipti shabýylshylarynyń biri. Jyldamdyǵy, tehnıkasy jáne qaýipti sátterdi joq jerden jasaı alatyn qabiletimen erekshelenetin ıAmal Eýro-2024-tegi jarqyn oıynynan keıin álem chempıonatynyń basty juldyzdarynyń biri bolýǵa úmitker.

2. Arda Gıýler (Túrkııa)

Madrıdtiń «Real» klýbynda óner kórsetetin Arda Gıýler túrik fýtbolynyń eń úlken úmiti retinde baǵalanyp júr. Onyń tehnıkalyq sheberligi, alańdy kórý qabileti men alystan dál soqqy jasaı alýy Eýropadaǵy eń perspektıvaly jas jartylaı qorǵaýshylar qataryna qosyp otyr.

3. Endrık (Brazılııa)

Brazılııalyq shabýylshy álem fýtbolyndaǵy eń talantty jas forvardtardyń biri retinde tanylyp keledi. Jeke sheberligi men fızıkalyq qýatynyń arqasynda ol match taǵdyryn jalǵyz ózi ózgerte alatyn oıynshylar sanatyna jatady. «Lıondaǵy» sátti kezeńnen keıin Endrık óz oıynyn qaıta qalypqa keltirip, ulttyq quramadaǵy mańyzdy fýtbolshylardyń birine aınaldy.

4. Ýorren Zaır-Emerı (Frantsııa)

PSJ men Frantsııa quramasynyń namysyn qorǵap júrgen Zaır-Emerı jastyǵyna qaramastan úlken tájirıbe jınaqtady. Ol fızıkalyq daıyndyǵymen, ámbebaptyǵymen jáne taktıkalyq saýattylyǵymen erekshelenedi.

5. Aleksandr Pavlovıch (Germanııa)

«Bavarııa» oıynshysy Germanııa quramasynyń ortalyq alańyndaǵy bolashaǵy zor fýtbolshylardyń biri sanalady. Dál pas berý, oıyndy uıymdastyra bilýi jáne qorǵanystaǵy senimdiligi onyń basty artyqshylyqtarynyń qatarynda.

 Nıderland quramasynyń kreatıvti oıynshysy retinde tanylǵan Sımons drıblıngimen, dál pastarymen jáne qarsylas qorǵanysyn buza alatyn qabiletimen erekshelenedi.

6. Florıan Vırts (Germanııa)

Eýropanyń úzdik jas shabýylshy, jartylaı qorǵaýshylarynyń biri sanalatyn Vırts fýtbol ıntellektisimen, shabýyl uıymdastyrý sheberligimen jáne sheshýshi sátterde gol soǵý qabiletimen kózge túsedi.

7. Djamal Mýsıala (Germanııa)

«Bavarııa» juldyzy óziniń erekshe drıblıngi men manevrli oıyny arqyly álemdegi eń qaýipti jas fýtbolshylardyń birine aınaldy. Germanııa quramasy da onyń shabýyldaǵy múmkindikterine úlken senim artady.

 8. Pedrı (Ispanııa)

«Barselona» jartylaı qorǵaýshysy Ispanııa quramasy oıynynyń negizgi uıymdastyrýshylarynyń biri bolyp sanalady. Onyń fýtbol ıntellektisi men oıyn qarqynyn baqylaýdaǵy sheberligi mamandar tarapynan joǵary baǵalanyp keledi.

9. Gavı (Ispanııa)

Gavı tehnıkasy, eńbekqorlyǵy jáne joǵary oıyn qarqynynyń arqasynda Ispanııa quramasynyń negizgi fýtbolshylarynyń birine aınaldy. Ol halyqaralyq deńgeıdegi mańyzdy týrnırlerde de mol tájirıbe jınaqtap úlgerdi. 2026 jylǵy álem chempıonatynda Gavı Ispanııa quramasynyń jartylaı qorǵanys shebinde mańyzdy ról atqarady dep kútiledi.

10. Dezıre Dýe (Frantsııa)

PSJ shabýylshysy qysqa ýaqyt ishinde Frantsııanyń eń jarqyn jas talanttarynyń qataryna qosyldy. Birneshe pozıtsııada oınaı alatyn fýtbolshy jekpe-jektegi senimdiligimen jáne gol soǵý qabiletimen erekshelenedi.

11. Joaý Nevesh (Portýgalııa)

Portýgalııalyq jartylaı qorǵaýshy taktıkalyq oılaý qabiletimen, dál pastarymen jáne úlken jumys kólemimen kózge túsip keledi. Sarapshylar ony ulttyq quramanyń mańyzdy oıynshylarynyń biri retinde baǵalaıdy.

Aıta keteıik, atalǵan fýtbolshylardyń basym bóligi úshin 2026 jylǵy álem chempıonaty mansabyndaǵy alǵashqy dúnıejúzilik doda bolmaq. Dál osy týrnırde olardyń birqatary álemdik fýtboldyń jańa sýperjuldyzdary retinde tolyq tanyla alady.

Buǵan deıin fýtboldan álem chempıonaty nege úsh elde ótetinin jazǵanbyz.