2026 jylǵy ÁCh matchtaryna bılet baǵasy belgili boldy: fýtbol jankúıerleri ashýly

ASTANA. KAZINFORM – Football Supporters Europe halyqaralyq jankúıerler qaýymdastyǵynyń esepteýine sáıkes, AQSh-taǵy matchtardyń baǵasy Qatarda 2022 jyly ótken álem chempıonaty matchtarymen salystyrǵanda bes ese ósti, dep habarlaıdy DW aqparat agenttigi. 

Football Supporters Europe Halyqaralyq jankúıerler qaýymdastyǵynyń málimetinshe, ÁCh fınalyna bıletter baǵasy – 4185 dollardan (shamamen 2,2 mln teńge) bastap 6900 dollarǵa (shamamen 3,6 mln teńge) deıin.

Uıym FIFA-ny osy baǵalar úshin synap, bıletterdi satýdy toqtatyp, baǵalardy túzetýdi talap etti.

Qatarda 2022 jylǵy álem chempıonatymen salystyrǵanda, AQSh-taǵy álem chempıonaty matchtarynyń baǵasy bes ese ósti. Mysaly, 2022 jylǵy álem chempıonatynyń fınalyna bılettiń quny 604 dollar boldy, al AQSh-ta ol 4185 dollarǵa baǵalanǵan.

Ulttyq jankúıerler qaýymdastyǵy músheleriniń kóp jaǵdaıda jankúıerler sektory úshin eń arzan 4-sanattaǵy bıletterge qol jetkize almaıtyny qatań synǵa alyndy. Qaýymdastyq málimetinshe, FIFA bul bıletterdi óz tarıhynda alǵash ret dınamıkalyq baǵa belgileýmen erkin satylymǵa shyǵaryp otyr.

- Bul álem chempıonaty dástúrlerine úlken opasyzdyq jáne jankúıerlerdiń osy kóriniske qosqan úlesin elemeý, - delingen FSE málimdemesinde.

Ulttyq fýtbol qaýymdastyqtarynyń múshelerine 2026 jylǵy álem chempıonatyna bıletterdi satý qańtar aıynda bastalady dep josparlanǵan. Týrnırdiń ózi 2026 jyldyń 14 maýsymy men 19 shildesi aralyǵynda AQSh, Kanada jáne Meksıkada ótedi dep josparlanǵan.

Osyǵan deıin fýtboldan 2026 jylǵy álem chempıonatynyń fınaly 19 shildede saǵat 15:00-de Nıý-Djersı shtatynyń Ist-Raterford qalasyndaǵy «Metlaıf» stadıonynda ótetinin jazdyq.