2026 jylǵy ÁCh: FIFA stadıonǵa sý ishetin bótelkelerdi alyp kirýge tyıym saldy
ASTANA. KAZINFORM – Jankúıerlerge álem chempıonaty kezinde stadıondarǵa sý bótelkelerin alyp kirýge ruqsat etilmeıdi, dep habarlaıdy tilshisi NBC News.
FIFA ókiliniń aıtýynsha, mundaı qadam oıynshylar men kórermenderdiń qaýipsizdigin qamtamasyz etý jáne túrli zattardan jaraqat alý qaýpin barynsha azaıtý úshin jasalyp otyr. Sonymen qatar stadıon aýmaǵynda shyny bótelkelerdi, keseler men konserv bankalaryn paıdalanýǵa da qatań tyıym salynbaq.
Bıylǵy dúbirli doda AQSh, Meksıka jáne Kanada elderinde ótetindikten, mamandar aptap ystyqtyń basty qıyndyq týdyratyn faktor bolatynyn eskertti. Máselen, AQSh-tyń ońtústik shtattarynda maýsym men shilde aılarynda aýa temperatýrasy 27-28°C-tan joǵary bolady dep boljanyp otyr.
– Aýa raıyna baılanysty FIFA uıymdastyrý komıtetterimen birlesip, jankúıerlerdiń jaılylyǵy úshin stadıondarda arnaıy sý shashyratqyshtar, jeldetkishter, salqyndatqysh shatyrlar men sý ishetin oryndardy daıyndaýdy josparlap otyr, - delingen málimdemede.
Aıta keterligi, buǵan deıingi erejede jankúıerlerge stadıonǵa kólemi 1 lıtrge deıingi bos plastık bótelkelerdi alyp kirýge ruqsat berilgen bolatyn. Alaıda, FIFA-nyń jańartylǵan 35 bettik kodeksinde bul norma tolyǵymen ózgerip, qaıta paıdalanýǵa bolatyn kez kelgen sý bótelkesine tyıym salynǵan zattar tizimine endi.
48 komanda baq synaıtyn týrnır 11 maýsym men 19 shilde aralyǵynda ótedi. Oıynshylardyń densaýlyǵyn qorǵaý maqsatynda ár taımda arnaıy úsh mınýttyq sý ishý úzilisi qarastyrylǵan.
Kýıns ýnıversıtetiniń zertteýine sáıkes, oıyn ótetin 16 stadıonnyń 14-inde aýa raıy adam densaýlyǵyna qaýip tóndiretindeı deńgeıde ystyq bolýy múmkin. Degenmen, qatań shekteýlerdiń de óz erekshelikteri bar. Máselen, ata-analarǵa ár balaǵa 1 lıtrge deıingi ydyspen náreste sútin nemese zararsyzdandyrylǵan sýdy alyp kirýge ruqsat etiledi. Sondaı-aq medıtsınalyq qajettilikke baılanysty suıyqtyqtardy (500 ml-den aspaıtyn kólemde) aǵylshyn, frantsýz nemese ıspan tilderindegi anyqtamasy bolsa, ózimen birge alyp ótýge bolady. Jańa kodeks boıynsha stadıonǵa qarý-jaraq pen pırotehnıkadan bólek, shý shyǵaratyn quraldardy (ysqyryq, múıiz, dınamık) jáne kólemdi sharlardy alyp kirýge de bolmaıdy.
Buǵan deıin AQSh-taǵy álem chempıonaty bıletteriniń jáne qonaqúılerde turý quny qansha bolatyny habarlanǵan bolatyn.
