2026 jylǵy 5 qańtardan bastap «Halyq býhgalteri» aktsııasy bastalady
ASTANA. KAZINFORM – Kásipkerlerdi qoldaý jáne býhgalterlik pen salyqtyq esepti júrgizý sapasyn arttyrý maqsatynda Qarjy mınıstrligi «Halyq býhgalteri» aktsııasyn iske qosady.
Aktsııa 2026 jylǵy 5 qańtarda bastalyp, 2026 jylǵy 30 maýsymǵa deıin jalǵasady.
«Halyq býhgalteri» — jeke kásipkerler men shaǵyn bıznes sýbektilerine arnalǵan tegin konsýltatsııalyq kómek.
Kásipkerler býhgalterlik esep, salyqtyq eseptilik jáne aqparattyq júıelermen jumys isteý máseleleri boıynsha túsinikti ári praktıkalyq túsindirmeler ala alady.
Negizgi format — qalalar men oblys ortalyqtaryndaǵy memlekettik kirister basqarmalary bazasynda oflaın qabyldaý.
2026 jylǵy qańtar–aqpan aılarynda konsýltatsııalar aptasyna 3 ret (dúısenbi, sársenbi, juma) saǵat 10:00-den 13:00-ge deıin ótkiziledi.
2026 jylǵy naýryzdan bastap konsýltatsııalar aptasyna 2 ret júrgiziledi.
Qabyldaý oryndary jumys kestesi men mekenjaıy kórsetilgen «Halyq býhgalteri» atty arnaıy mańdaıshalarmen belgilenetin bolady.
- Aktsııa aıasynda konsýltatsııalardy kásibı býhgalterler men aýdıtorlar, kásibı býhgalterlik birlestikterdiń ókilderi, sondaı-aq zańnama normalaryn túsindirý úshin memlekettik kirister organdarynyń eń tájirıbeli qyzmetkerleri júrgizedi.
Astana, Almaty jáne Shymkent qalalarynda konsýltatsııalar ótkizý úshin jeke oryndar belgileý josparlanyp otyr, múmkindiginshe qalanyń barlyq aýdandarynda. Óńirlerde konsýltatsııalar aýdandyq deńgeıde, qajet bolǵan jaǵdaıda mamandardyń barýymen uıymdastyrylady, - delingen mınıstrliktiń aqparatynda.
Sondaı-aq qabyldaý ýaqytynda aýdandyq jáne qalalyq basqarmalar arasynda beınebaılanys pen telefon arqyly keńes berý múmkindigi kózdelgen.
Betpe-bet konsýltatsııalardan bólek, kásipkerler úshin kelesi múmkindikter qoljetimdi bolady:
- resmı resýrstar arqyly onlaın-konsýltatsııalar;
- vebınarlar (onlaın jáne oflaın formatta);
- esepti kezeńderde taqyryptyq konsýltatsııalyq sessııalar.
Memlekettik kirister komıteti zańnama normalaryn qarapaıym tilmen túsindiretin jáne aqparattyq júıelerde jumys isteý boıynsha qadamdyq nusqaýlyqtary bar negizgi taqyryptar boıynsha býkletter daıyndaıdy.
Sonymen qatar Call-ortalyqqa arnalǵan materıaldar jańartylyp, SalykBot Telegram-arnasy aqparatpen tolyqtyrylady.
«Halyq býhgalteri» aktsııasy salyq tóleýshilermen jumys isteýde baqylaý modelinen servıstik súıemeldeýge kóshý jolyndaǵy alǵashqy qadam bolyp tabylady. Aldaǵy ýaqytta quqyq buzýshylyqtardyń aldyn alýǵa jáne konsýltatsııalyq qoldaýdyń sapasyn arttyrýǵa baǵyttalǵan qosymsha sharalardy iske asyrý josparlanýda.
Aıta keteıik, Qazaqstanda mıkro jáne shaǵyn bıznes úshin salyqtyq ákimshilendirý jeńildeıdi.