2026 jylǵa tyńaıtqysh engizý jospary 2,3 mln tonnaǵa jetedi — AShM

ASTANA. KAZINFORM — Búgin Úkimet otyrysynda Aýyl sharýashylyǵy mınıstri Aıdarbek Saparov tyńaıtqysh paıdalaný deńgeıi qanshalyqty óskenin aıtty. 

— Ótken jyldyń qorytyndysy boıynsha tyńaıtqysh engizý deńgeıi alǵash ret ǵylymı negizdelgen qajettiliktiń 58%-ine jetip, 1,8 mln tonna boldy. 2026 jylǵa tyńaıtqysh engizý jospary 2,3 mln tonna. Búgingi kúni 245 myń tonnaǵa kelesim shart jasaldy, bul jalpy kólemniń 10,6 paıyzyn ǵana qamtıdy. Sol sebeppen oblys ákimdikteri osy baǵytta jumysty kúsheıtýleri qajet. 2024 jyly engizilgen mıneraldyq tyńaıtqyshtardy sýbsıdııalaýdyń avanstyq tetigi otandyq tyńaıtqyshtar óndirisiniń kólemin ulǵaıtýǵa oń yqpal etkenin atap ótkim keledi, — dedi Aıdarbek Saparov.

Onyń aıtýynsha, 2025 jyly KazAzot zaýytynyń tyńaıtqysh óndirisi 11,5%-ǵa ósti, al Kazfosfat óndirisiniń kólemi 1,8 esege ulǵaıdy.

— Atap aıtqanda, ákimdikterge qar toqtatý jáne ylǵaldy ustap qalý jumystaryn ýaqtyly júrgizý qajettigin eske salǵym keledi. Sonymen qatar, tuqym tańdaý, sebý merzimderin saqtaý, tyńaıtqyshtardy paıdalaný, sebýge deıingi topyraqty óńdeý jáne basqa da qajetti is-sharalardy ýaqtyly ári durys oryndaýǵa erekshe nazar aýdarý qajet, — dedi mınıstr.

Budan buryn habarlanǵandaı, bıyl jalpy egis alańy shamamen 23,8 mln gektar boldy.