2026 jylǵa deıin dárilik habtar qurylady

ASTANA. KAZINFORM –  Búgin «SQ-Farmatsııa» JShS bazasynda Densaýlyq saqtaý mınıstri Aqmaral Álnazarovanyń tóraǵalyǵymen keńes ótti, onda halyqty dári-dármekpen qamtamasyz etýdiń sapasy men qoljetimdiligi máseleleri talqylandy. 

Dári-dármekter men medıtsınalyq buıymdardy satyp alý, otandyq óndirýshilerdi qoldaý, sondaı-aq preparattardyń qoljetimdiligin jaqsartý jáne bıýdjet qarajatyn utymdy paıdalaný maqsatynda Biryńǵaı dıstrıbıýtordyń kelissózderi basty nazarda boldy.

Keńeske qatysýshylar logıstıkaǵa jáne SQ-Farmatsııanyń jeke qoıma ınfraqurylymyn qurýǵa, baǵany tómendetýge beıimdiligi bar zamanaýı sapaly medıtsınalyq tehnıkany satyp alýǵa jeke toqtaldy.

— Mınıstrdiń tapsyrmasy boıynsha 2026 jyldyń sońyna qaraı óziniń dárilik habtary paıda bolýy tıis, bul dári-dármekter men medıtsınalyq buıymdardy saqtaýǵa jumsalatyn shyǵystardy qysqartýǵa, logıstıkanyń turaqtylyǵy men boljamdylyǵyn qamtamasyz etýge, sondaı-aq saqtaý júıesiniń senimdiligin arttyrýǵa múmkindik beredi.

Budan basqa, Biryńǵaı dıstrıbıýtordyń ishki protsesterin reınjınırıngteý bóliginde tsıfrlyq sheshimderdi engizý máseleleri talqylandy. Bul logıstıkanyń utymdylyǵy men ashyqtyǵyn arttyrý, baqylaýdy kúsheıtý jáne tasymaldaý shyǵyndaryn azaıtý týraly, bul dári-dármekpen qamtamasyz etý júıesin odan da ashyq jáne yńǵaıly etýge kómektesedi, — delingen Densaýlyq saqtaý mınıstrligi habarlamasynda.

Qabyldanǵan sharalar ár patsıentke qajetti dári-dármekterdi ýaqytynda alýǵa baǵyttalǵan. Atalǵan sheshimder men ınnovatsııalar dári-dármekpen qamtamasyz etý júıesiniń tıimdiligin arttyrýǵa jáne eldiń densaýlyq saqtaýyndaǵy Biryńǵaı dıstrıbıýtordyń rólin kúsheıtýge múmkindik beredi. 

Aıta ketelik elimizde dári-dármek baǵasy tómendeıdi.