2026 jylǵa astyq eksporty shyǵynyn sýbsıdııalaýǵa 30 mlrd teńge qajet - AShM
ASTANA. KAZINFORM – Astyq eksporty shyǵyndaryn sýbsıdııalaý esebinen alynǵan kiris 150 mlrd teńgege jetti. Bul týraly Májilistiń Agrarlyq máseleler komıtetinde astyqty tasymaldaýdyń ózekti máselelerine arnalǵan otyrysta Aýyl sharýashylyǵy vıtse-mınıstri Ermek Kenjehanuly aıtty.
- Astyqtyń eksport geografııasy álemniń 45 elin qamtyp otyr. Otandyq astyqqa turaqty suranys saqtalǵan. Sońǵy 5 jylda alǵash ret Iranǵa 1 mln, Ázerbaıjanǵa 700 myń tonna astyq jóneltilimi qaıta jandandy. Buǵan deıingi kólemnen ondaǵan ese kóp. Sonymen qatar elimizge dástúrli emes Belgııa, Polsha, Norvegııa, Portýgalııa sııaqty Eýropa memleketteriniń naryǵyna astyǵymyz jetkizilip jatyr, - dedi ol.
Onyń atap ótýinshe, astyq eksportyna qatysty mınıstrlik birqatar baǵytty basymdyq retinde qarastyryp otyr. Olardyń qatarynda Afrıka, Ońtústik-Shyǵys Azııa jáne Arab elderi naryǵy bar. Bul rette Marokko, BAÁ, Vetnamǵa 180 myń tonna astyq jóneltildi.
- Astyq eksportynyń rekordtyq kólemine tasymal shyǵyndaryn sýbsıdııalaý oń áserin tıgizdi. Bıyl astyq tasymaldaý shyǵyndaryn sýbsıdııalaýǵa 31 mlrd teńge qarastyryldy. Osy qarajatpen 1 mln tonnadan astam astyqty qamtydyq. Búginde atalǵan 31 mlrd teńgeniń 21,8 mlrd teńgesi bólindi. Osy bólingen qarajat esebinen eksporttalǵan ónimnen túsken jalpy kiris shamamen 150 mlrd teńge bolyp otyr. Osy jyldyń joǵary ónimdiligin eskere otyryp, ereje kúshin 1 jylǵa – 2026 jyldyń 1 qyrkúıegine deıin uzarttyq, - dedi vıtse-mınıstr.
Osy oraıda ol máselelerdiń de bar ekenin atap ótti.
- Bıyl qarastyrylǵan qarjyǵa sýbsıdııa ótinimderin qabyldadyq. Onymen «Azyq-túlik kelisimshart» korporatsııasy aınalysyp jatyr. Biraq áli 9,2 mlrd teńge kóleminde qarjylandyrýdy kútip otyrmyz. Búginde sharýalardyń eksporttyq shyǵyndaryn sýbsıdııalaýǵa bergen ótinimderi bizde tur. Kelesi jyly da osy jumysty jalǵastyrmaqpyz. Ol úshin kelesi jyly 30 mlrd teńge qajet. Soǵan qoldaý bildirýlerińizdi suraımyz. Óıtkeni kelesi jyly bul baǵytqa qarjy qarastyrylmaǵan, - dedi Ermek Kenjehanuly.
Buǵan deıin Kólik vıtse-mınıstri Jánibek Taıjanov kólik salasy astyqtyń jańa ónimin tasymaldaýǵa tolyǵymen daıyn ekenin aıtqan edi.