2026 jylǵa 567 mlrd teńgege dárilik zattar satyp alyndy - «SQ-Farmatsııa»
ASTANA. KAZINFORM – 2026 jylǵa arnalǵan dárilik zattar men medıtsınalyq buıymdardy satyp alý naýqany aıasynda medıtsınalyq uıymdar jalpy somasy 567 mlrd teńgeden astam qarajatqa ótinim bergen. Bul týraly «SQ-Farmatsııa» JShS uıymdastyrǵan brıfıngte basqarma tóraǵasy baıandady.
Onyń aıtýynsha, kelesi jylǵa medıtsınalyq uıymdar tarapynan 2111 ataýdaǵy dárilik zattar men medıtsınalyq buıymdarǵa ótinim túsken. Sonyń negizinde 2038 ataý boıynsha satyp alý josparlanyp, qazirgi tańda onyń 71 paıyzy satyp alynǵan.
– 2026 jylǵa josparlanǵan satyp alýlardyń jalpy somasy 559,1 mlrd teńgeni quraıdy. Onyń ishinde 1442 ataý satyp alyndy, 1349 ataý boıynsha sharttar jasaldy. Bul – satyp alý protsesiniń negizgi bóligi ýaqtyly aıaqtalǵanyn kórsetedi, – dedi «SQ-Farmatsııa» JShS basqarma tóraǵasy Nurlybek Asylbekov.
Sonymen qatar, ol mindetti áleýmettik medıtsınalyq saqtandyrý (MÁMS) aıasyndaǵy shyǵyndardyń 2025 jylmen salystyrǵanda tórt esege artqanyn, al tegin medıtsınalyq kómektiń kepildik berilgen kólemi (GOBMP) boıynsha satyp alý kóleminiń 28 paıyzǵa tómendegenin atap ótti. Bul ózgerister qyzmet paketteriniń qaıta bólinýimen jáne birqatar dárilik zattardyń biryńǵaı dıstrıbıýtor tizbesinen shyǵarylýymen baılanysty.
Qazirgi tańda 596 ataýdaǵy dárilik zattar men medıtsınalyq buıymdar satyp alý protsesinde tur. Jetkizý jumystary 5 qańtardan bastap elimizdiń medıtsınalyq uıymdaryna kezeń-kezeńimen júzege asyrylady.
Onyń aıtýynsha, 2026 jylǵy satyp alý naýqany aıasynda 320-dan astam dárilik zat deldaldardyń qatysýynsyz, otandyq jáne sheteldik óndirýshilerden tikeleı satyp alynbaq. Bul kórsetkish aldyńǵy jyldarmen salystyrǵanda eki esege artqan.
Aıta keteıik, Qarjylyq monıtorıng agenttigi «SQ-Farmatsııa» kompanııasyna qatysty bıýdjet qarajatyn jymqyrý faktisi boıynsha tergeý júrgizip jatqany jaıly jazǵan edik.