2026 jyldyń І toqsanynan keıin Astanadaǵy kommýnaldyq tarıfter ózgerýi múmkin
ASTANA. KAZINFORM – Astanada kommýnaldyq tarıfter 2026 jyldyń І toqsanynan keıin ósýi múmkin. Bul týraly qalalyq tabıǵı monopolııalardy retteý departamenti basshysy Jandos Salımov óńirlik kommýnıkatsııalar qyzmetinde ótken baspasóz máslıhatynda aıtty.
- Prezıdenttiń tapsyrmasy boıynsha búkil kommýnaldyq tarıfterdi 2026 jyldyń birinshi toqsanynyń aıaǵyna deıin ósirmeı ustap turý sharasy qolǵa alyndy. Bul – úlken jumys. Onyń ishinde memleket ýaqytsha sýbsıdııalaıtyn tarıfter bar. Ol tarıfterdiń sýbsıdııalanatyn merzimi bitse, tarıf kóteriledi degen sóz. Degenmen ol tarıfter de 2026 jyldyń birinshi toqsanynyń aıaǵyna deıin búgingi deńgeıde saqtalady. Odan bólek ósýi josparlanǵan tarıfter bar. 2026 jyldyń 1 qańtarynan bastap ósetini bekitiligen tarıfter bar, mysaly. Ol tarıfterdi de arnaıy buıryqpen birinshi toqsanǵa deıin toqtatyp qoıdyq. Al birinshi toqsannan keıin qaı tarıftiń naqty qansha paıyz kóteriletinin aıta almaımyn, - dedi Jandos Salımov.
Onyń sózinshe, kommýnaldyq kompanııalardan mejeli ýaqyttan keıin tarıfti kóterý týraly ótinimder túsip jatyr.
- Ótinimderdi qarap jatyrmyz. Onyń ishinde kóp spetsıfıkalyq kórsetkishter bar. Inflıatsııa men ındeksatsııaǵa baılanysty talaptar degen sııaqty... Osylardyń bárin eseptep, qaraımyz. Árıne, ózgerister bolýy múmkin. Sebebi ýaqyt óte kele zań boıynsha, basqa da erejeler boıynsha kommýnaldyq nysandardyń ahýalyn oılaýymyz kerek. Ózderińiz bilesizder, ár sýbektiniń artynda qyzmetkerler tur. Olardyń jalaqysy, basqa da shyǵyndar bar. Bul shyǵyndardyń quny da bir ornynda turmaıdy. Sondyqtan da ózgeredi. Al birinshi toqsannyń aıaǵyna deıin eshqandaı ózgeris bolmaıdy, - dedi departament basshysy.
Buǵan deıin Astanadaǵy 13 kommýnaldyq kompanııa 156,6 mln teńgeni negizsiz tapqanyn jazǵan edik.