Maýsym jáne shilde aıynda Batys Eýropada temperatýra rekordyn jańartty
ASTANA. KAZINFORM — Eýropalyq klımattyń ózgerýi jónindegi Copernicus qyzmetiniń málimetinshe, 2026 jyldyń maýsym jáne shilde aılary Batys Eýropada baqylaýdyń barlyq kezeńindegi eń joǵary ortasha temperatýra rekordyn ornatty, dep habarlaıdy DW.
Osy kezeńde ortasha temperatýra 21,62°C-qa jetti — bul 1991-2020 jyldardaǵy ortasha deńgeıden 2,79°C joǵary.
Copernicus atap ótkendeı, Batys Eýropada aptap ystyq kóktemniń sońynan beri jalǵasyp keledi: mamyr aıynan bastap aımaqta aptap ystyqtyń tórt tolqyny tirkeldi, bul aımaq úshin erekshe joǵary kórsetkish.
Al Shyǵys Eýropa men Skandınavııada jaz aıtarlyqtaı salqyn boldy.
Shildedegi rekordtyq temperatýra tek Batys Eýropada baıqalǵan joq. Polıarlyq aımaqtardan tys jerlerde de álemdik muhıt rekordtyq mánge deıin jylyndy. Jylynýǵa yqpal etken faktorlardyń biri Tynyq muhıtynyń tropıkalyq bóligindegi «El-Nıno» qubylysy boldy.
Ol aldaǵy aılarda kúsheıedi dep boljanyp otyr.
Teńiz betiniń ortasha temperatýrasy shilde aıynda ońtústik jáne soltústik endikterdiń 60 gradýsy arasynda 20,96°C-ty quraǵan, bul úsh jyl buryn sol aıda tirkelgen 20,89°C rekordtan asyp tústi.
Osyǵan deıin Rýmynııada aptap ystyqqa baılanysty búkil el boıynsha qaýiptiliktiń eń joǵary qyzyl deńgeıi jarııalanǵanyn habarladyq.
Sondaı-aq Aýstrııa men Slovakııada aptap ystyqtyń tarıhı rekordy tirkelgenin jazdyq.
