2026 jyldyń alǵashqy eki aıynda bıýdjet kiristeri jospardan asty
ASTANA. KAZINFORM — 2026 jyldyń qańtar–aqpan aılarynyń qorytyndysy boıynsha respýblıkalyq bıýdjet kiristeri josparǵa saı jáne turaqty túrde oryndaldy, dep habarlaıdy Memlekettik kirister komıtetiniń baspasóz qyzmeti.
2026 jylǵy 1 naýryzdaǵy jaǵdaı boıynsha respýblıkalyq bıýdjettiń salyqtyq túsimderi boıynsha jospardyń oryndalýy 113,7 qurady, bıýdjetke 2 979,0 mlrd teńge tústi. Ótken jyldyń uqsas kezeńimen salystyrǵanda ósý qarqyny 677,5 mlrd teńge nemese 129,4%.
Oń dınamıka negizgi bıýdjet quraýshy salyqtar esebinen qamtamasyz etildi. Korporatıvtik tabys salyǵy (KTS) boıynsha ósý qarqyny 116,9% (+118,0 mlrd teńge), Qosylǵan qun salyǵy (QQS) boıynsha 138,8% (+428,6 mlrd teńge) qurady.
Sonymen qatar, aqparattyq keńistikte buryn 2026 jyldyń qańtar aıyndaǵy derekterge negizdelgen saraptamalyq baǵalaýlar paıda boldy.
Aıta ketý kerek, mundaı qorytyndylar bıýdjet kiristeriniń shynaıy jaǵdaıyn tolyq kórsetpeıdi. Sebebi 2025 jyldyń tórtinshi toqsanyna qatysty keıbir negizgi tólemder 2026 jyldyń 25 aqpanyna deıin tólenedi.
Tıisinshe, túsimderdiń edáýir bóligi dástúrli túrde aqpan aıynyń qorytyndysy boıynsha qalyptasady. Nátıjesinde, 1 naýryzǵa QQS boıynsha jospardyń oryndalýy 119,8%-dy quraıdy nemese jospar 1 281,0 mlrd teńge, naqty túsim 1 534,5 mlrd teńge.
— Eki aıdyń qorytyndysy bıýdjettiń kiris bóliginiń oryndalýyn obektıvti sıpattaıdy jáne kiristerdiń turaqty ósýin jáne aldyn ala teris baǵalaýǵa negizderdiń joqtyǵyn rastaıdy. Naqty derekter salyq túsimderiniń oń dınamıkasyn jáne aǵymdaǵy makroekonomıkalyq jaǵdaılarǵa sáıkes keletinin kórsetedi, — dep atap ótti komıtet.
Budan buryn 2026 jyldyń 1 naýryzynan bastap Qazaqstanda arnaıy salyq rejımderiniń jańa tártibi kúshine enetinin jazǵanbyz. Endi kásipkerler men ózin-ózi jumyspen qamtyǵan azamattar úsh rejımniń birin tańdaýy kerek.