2026 jyldyń 1-toqsanynda LRT resmı iske qosylady – Jeńis Qasymbek
ASTANA. KAZINFORM – 2026 jyldyń 1-toqsanynda LRT resmı iske qosylady. Bul týraly Astana qalasynyń ákimi Jeńis Qasymbek aıtty.
- Jalpy, jazdyń sońyna deıin poıyzdardyń bári qalaǵa jetkiziledi. Qurylys jumystary tolyǵymen aıaqtalady jáne kúzdiń basynda pılottyq rejımde iske qosý jáne jóndeý jumystaryn bastaımyz. 3-ten 6 aıǵa deıin ýaqyt kerek. Bizdiń josparymyz boıynsha kelesi jyldyń 1-toqsanynda bul kólik resmı túrde jumysyn bastaıdy, - dedi ol Aqordada BAQ ókilderiniń saýalyna oraı.
Aıta keteıik, 30 mamyrda Aqordada BAQ ókilderi birinshi vıtse-premer Roman Sklıardan LRT qashan paıdalanýǵa beriletinin suraǵan edi. Saýalǵa jaýap bergen ol qarjylandyrýdyń bar ekenin, jaqynda testilik rejımde iske qosý júrgiziletindigin aıta kele, LRT resmı túrde kelesi jyldyń sońynda qosylatynyn aıtqan bolatyn.
24 mamyrda Qytaıdyń Tanshan qalasynda Astana qalasyna arnalǵan LRT vagondarynyń alǵashqy eki quramy jiberildi. Tanshan qalasyndaǵy zaýytta joba aıasynda barlyǵy 19 birlik jyljymaly quram jasalady. Zamanaýı, tórt sektsııaly, júrgizýshisiz júretin, avtomattandyrýdyń tórtinshi deńgeıindegi vagondardyń árqaısysy 650 jolaýshyǵa arnalǵan.