2026 jyldan munaı óndirý kólemi 100 mln tonnadan asady — Almasadam Sátqalıev
ASTANA. KAZINFORM — Bıylǵy 10 aıda 73,5 mln tonna munaı óndirildi. Bul týraly Parlament Májilisindegi Úkimet saǵatynda munaı salasyn damytýdy talqylaý kezinde QR Energetıka mınıstri Almasadam Sátqalıev málim etti.
«10 aıdyń qorytyndysy boıynsha munaı óndirý 73,5 mln tonnany qurady. Bıyl 88,4 mln tonna munaı óndirý eskerilgen. Josparmen salystyrǵanda óndiris kóleminiń tómendeýi Teńiz jáne Qashaǵan iri ken oryndaryndaǵy kúrdeli jóndeý jumystaryna baılanysty. Sondaı-aq, óndiris kóleminiń tómendeýine Qarashyǵanaq ken ornyndaǵy jospardan tys jumystyń toqtaýy men Orynbor gaz óńdeý zaýytynda gaz alýǵa shekteýler áser etti. Óndiris deńgeıiniń tómendeýine OPEK+ kelisimi boıynsha mindettemelerdiń oryndalýy da áser etip otyr», — dedi A. Sátqalıev.
Onyń aıtýynsha, Qazaqstan OPEK+ kelisimine qatysyp otyr. Qazaqstan úshin basqa elder sııaqty 2024 jylǵa tıisti mindettemeler belgilengen. Kelisimniń talaptaryn oryndaý álemdik munaı naryǵyndaǵy turaqtylyqty saqtaý úshin qajet.
«Elimizdiń munaı-gaz keshenin damytýda elimizde munaı óndirýdiń 65 paıyzyn quraıtyn úsh iri ken orny mańyzdy ról atqarady. Jobalardy iske asyrý bastalǵannan beri jalpy tikeleı ınvestıtsııa kólemi shamamen 185 mlrd AQSh dollaryn qurady. Boljamdarǵa sáıkes, 2026 jyldan bastap iri jobalardy júzege asyrý esebinen jyldyq munaı óndirý kólemi 100 mln tonnadan asady. Teńizshevroıl munaı óndirýdi jylyna 12 mln tonnaǵa arttyrýdy qamtamasyz etetin Keleshek keńeıtý jobasyn júzege asyryp otyr. Qarashyǵanaqta besinshi kompressordaǵy jumystar aıaqtaldy, shıki gazdy qaıta aıdaý úshin altynshy kompressordy iske qosý jumystary atqarylyp jatyr. Bul munaı óndirýin jylyna 11-12 mln tonna deńgeıinde saqtalýyn qamtamasyz etedi. Bul rette ken ornynda qýattylyǵy 4 mlrd tekshe metr gazdy óńdeıtin zaýytty salý jobasy júzege asyrylyp otyr. Aıaqtalý merzimi — 2028 jyldyń sońy», — dedi mınıstr.
Vedomstvo basshysy Qashaǵanda 2026 jyldan bastap munaı óndirýdi 1 mln tonnaǵa arttyrýdy kózdeıtin qýaty jylyna 1 mlrd tekshe metr gaz óńdeý zaýytyn salý jumysy atqarylyp jatqanyn eske saldy.
«Sonymen qatar 2029 jyly qýaty jylyna 2,5 mlrd tekshe metr gaz óńdeý zaýytyn salý arqyly munaı óndirýdi 2 mln tonnaǵa arttyrýdy qamtamasyz etý qarastyrylǵan. Jalpy alǵanda, úsh iri jobadaǵy munaı óndirý respýblıkadaǵy barlyq munaı óndirýdiń 70 paıyzyn quraıdy, oǵan shamamen 17 mlrd dollar ınvestıtsııa salynady», — dedi mınıstr.
Eske salsaq, buǵan deıin mınıstr elimizde munaı-gaz salasynda 1,3 myńnan astam kásiporyn qyzmet etip jatqanyn aıtty.