2026 jyldan múgedektigi bar jandarǵa járdemaqy 10 paıyzǵa ósedi
ASTANA. KAZINFORM — QR Eńbek jáne halyqty áleýmettik qorǵaý vıtse-mınıstri Vıktorııa Shegaı múgedektigi bar adamdardy áleýmettik qorǵaýǵa qatysty jumystarǵa túsinik berdi.
- 2025 jyldan bastap múgedektikti dástúrli áleýmettik jáne medıtsınalyq modelderden áleýmettik-quqyq qorǵaý modeline kóshýin kózdeıtin Qazaqstan Respýblıkasynda ınklıýzıvti saıasat tujyrymdamasy iske asyrylyp otyr. Jańa modeldi engizý jumyspen qamtý jáne áleýmettik qyzmetter sapasyn arttyrýǵa, ekonomıkalyq derbestik deńgeıine qol jetkizýge yqpal etedi. Tujyrymdamanyń 13 baǵyty boıynsha memlekettik organdar ákimdiktermen birlesip 52 is-shara iske asyrady, - dedi V. Shegaı Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, qazirgi ýaqytta Qazaqstanda 750 myńnan astam adamnyń múgedektigi bar. Sonyń arasynda 18 jastan asqan eresekter sany 630 myńnan astam nemese 84 paıyzy, al múgedektigi bar balalardyń sany – 120 myń.
- Múgedektigi boıynsha memlekettik áleýmettik járdemaqylar - el azamattarynyń konstıtýtsııalyq kepildikteriniń biri. Olar eńbek ótili men jumysynyń bolýyna qaramastan tólenedi. Járdemaqy mólsheri múgedektiktiń tobyna jáne sebebine baılanysty. Jyl saıyn ınflıatsııa deńgeıin eskere otyryp, olardy ındeksteý júrgiziledi. Máselen, 2026 jylǵy 1 qańtardan bastap olardyń mólsheri 10 paıyzǵa ósedi, - dedi vıtse-mınıstr.
Onyń sózine qaraǵanda, 2025 jylǵy 1 jeltoqsandaǵy jaǵdaı boıynsha múgedektigi boıynsha járdemaqylardy 543,1 myń adam aldy. Jyl basynan tólemderge 467,2 mlrd teńge baǵyttaldy.
Mınıstrlik aqparatyna qaraǵanda, járdemaqy mólsheri 2025 jyly 55 myń teńgeden 102 myń teńge aralyǵynda. Járdemaqynyń ortasha mólsheri - 78 822 teńge.
Budan buryn habarlanǵandaı, jyl basynan beri múgedektik tobyn belgileý úshin medıtsınalyq-áleýmettik saraptama júrgizýdiń syrttaı formaty boıynsha pılottyq jobany iske asyrý sheńberinde Qazaqstannyń barlyq óńirlerinen 99,6 myń ótinim qaraldy.