2026 jyldan bastap ulttyq standartty ázirleý merzimi qysqarady

ASTANA. KAZINFORM – 2026 jyldan bastap Qazaqstanda standarttar ázirleý protsesi tolyqtaı tsıfrlyq formatqa kóshiriledi. Bul týraly Saýda jáne ıntegratsııa mınıstrligi Tehnıkalyq retteý jáne metrologııa komıtetiniń standarttaý jáne taýarlardyń shyǵý tegi basqarmasynyń basshysy Nurbek Qazbek málim etti.

– «E-standart» aqparattyq júıesin qurýdy josparlap otyrmyz. Júıeni tsıfrlandyrý protsestiń ashyqtyǵyn arttyryp, standartty ázirleý barysynda kelisý merzimin aıtarlyqtaı qysqartýǵa múmkindik beredi. Osylaısha 2026 jyldan bastap standarttardy ázirleý rásimin tolyq tsıfrlandyrýdy josparlap otyrmyz. Bul, eń aldymen, ashyqtyqty qamtamasyz etedi. Ekinshiden, standart jobalaryn kelisý rásimi qaǵazbastylyqtan arylady, – dedi Nurbek Qazbek ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, qaǵaz formatynda memlekettik organdarmen, kásiporyndarmen jáne basqa da múddeli taraptarmen kelisý 6 aı ýaqytty alady.

– «E-standart» júıesi aıasynda merzimdi qysqartýdy josparlap otyrmyz, – deıdi spıker.

Sondaı-aq Saýda jáne ıntegratsııa mınıstrliginiń ókili Qazaqstanda ulttyq standarttardy onlaın qoldaný múmkindigi baryn eske saldy.

– «QazStandart» RMK saıtynda standarttardyń biryńǵaı qory bar. Onda kez kelgen ulttyq standartty tegin alýǵa bolady. Tek tirkeýden ótip, Qazaqstan Respýblıkasynyń rezıdenti ekenin rastaý qajet. Biraq, sheteldik standarttar aqyly, óıtkeni avtorlyq quqyqqa sáıkes, tegin tarata almaımyz, – dep túsindirdi Nurbek Qazbek.

Aıta keteıik, Qazaqstanda ómir sapasynyń biryńǵaı ulttyq standarty engizilýi múmkin.