2026 jyldan bastap tsıfrlyq aktıvterge salynatyn salyqqa ózgerister engiziledi – Memlekettik kirister komıteti
ASTANA. KAZINFORM – Qazaqstanda 2026 jyldary tsıfrlyq aktıvterdi retteýge qatysty salyq zańnamasyna birqatar mańyzdy ózgerister engizildi. Bul týraly Memlekettik kirister komıtetiniń Tsıfrlyq aktıvterdi ákimshilendirý basqarmasynyń basshysy Talǵat Ádilov tikeleı efır barysynda málim etti.
– Tsıfrlyq aktıvter qazirgi ýaqytta elimizdiń ekonomıkasynda eleýli oryn alyp otyr. Sondyqtan bul salaǵa qatysty zańnamada birqatar ózgerister engizildi. Ózgerister tek 2026 jyldan bastap qana emes, sonymen qatar 2025 jyldyń ózinde de iske qosyldy. Eń bastysy – bul jeke tulǵalar men zańdy tulǵalardyń tsıfrlyq aktıvterdi satýyna qatysty salyqtyq retteý. Ásirese, aktıvti ótkizý kezinde esepteý tártibi naqtylandy, – dedi Ádilov.
Spıkerdiń aıtýynsha, 2025 jylǵy shilde aıynda osy jyldyń basynan kúshine enetin erejeler bekitildi. Onda jeke tulǵalardyń tsıfrlyq aktıvterdi satýynan túsken tabysyna salyq salý tártibi naqtylanǵan.
Tsıfrlyq aktıvti satý kezinde pozıtıvti aıyrma esepke alynady. Esepteý ádisi retinde FIFO prıntsıpi qabyldandy. Mysaly, azamat 2023 jáne 2024 jyldary belgili bir baǵamen Bitcoin satyp aldy delik. Eger ol aktıvti 2025 jyly satsa, tabysty esepteý úshin satý baǵasynan eń alǵash satyp alǵan baǵasy alynyp tastalady. Osylaısha, salyq salynatyn tabys anyqtalady, – dedi Talǵat Ádilov.
Sondaı-aq spıkerdiń aıtýynsha, aktıvti ıelený jáne ótkizý sáti naqty belgilenip kórsetildi. Oǵan qosa qamtamasyz etilmegen aktıvter uǵymy engizilip, jeke tulǵa krıptovalıýta ámııanyna ıe boldy. Ony da salyqtyq esepke qosý mindetti bolady atap ótti.
Sonymen qatar tikeleı efır barysynda zańdy tulǵalarǵa qandaı ózgerister engiziletini aıtyldy.
– 2026 jyldan bastap zańdy tulǵalarǵa qatysty da ózgerister kúshine enedi. Atap aıtqanda, tsıfrlyq aktıvterdi ótkizý kezinde qun ósimi retinde tabys esepteledi jáne oǵan sáıkes salyq salynady. Sonymen qatar zańdy tulǵalar úshin 100-nysanǵa jańa bólim men qosymsha engizildi, – dedi Ádilov.
2026 jyldan bastap salyq eseptiliginiń 100-nysanyna tsıfrlyq aktıvterge qatysty jeke bólim engizildi, oǵan sáıkes krıptobırjalar, maınıng pýldary jáne krıptoındýstrııanyń basqa da qatysýshylary óz aktıvterin bólek kórsetýge mindetti. Sonymen qatar jańa qosymshada tsıfrlyq aktıvterdiń qaldyqtary kórsetilýi tıis, al jeke jáne zańdy tulǵalar krıptoámııandardyń bar-joǵy týraly málimetti salyq organdaryna usynýy qajet.
– Bul ózgerister halyqaralyq uıymdardyń usynymdary negizinde engizildi. Endi barlyq salyq tóleýshiler óz krıptoámııandary, aktıvteri jáne olardyń qozǵalysy týraly tolyq aqparat berýi tıis, – dep túıindedi komıtet ókili.
Buǵan deıin Qazaqstanda salyqtyq bereshekti ákimshilendirýge qatysty jańa ózgerister engizilgenin jazǵanbyz.