2026 jyldan bastap taǵy 1 mıllıonǵa jýyq azamat MÁMS-pen qamtylady
ASTANA. KAZINFORM — Áleýmettik medıtsınalyq saqtandyrý qoryniń málimetinshe, elimizde shamamen 17 mıllıon adam mindetti áleýmettik medıtsınalyq saqtandyrý (MÁMS) júıesinde saqtandyrylǵan. Bul týraly elorda ákimdigi málim etti.
Olardyń ishinde 12 mıllıon azamat jeńildik sanatyna jatady. Bul qatarǵa balalar, stýdentter, júkti áıelder, zeınetkerler jáne múgedektigi bar adamdar kiredi. Taǵy 4,5 mıllıon adam MÁMS jarnalaryn óz qarajaty esebinen tólep otyr.
— Sonymen birge 3 mıllıonnan astam azamattyń saqtandyrylǵan mártebesi joq. Olardyń shamamen 1 mıllıony ózdiginen jarna tóleýge múmkindigi joq adamdar sanatyna jatady. 2026 jylǵy 1 qańtardan bastap bul azamattar úshin mindetti áleýmettik medıtsınalyq saqtandyrý jarnalary jergilikti atqarýshy organdardyń esebinen tólenetin bolady, — delingen habarlamada.
Sondaı-aq resmı túrde tirkelgen jumyssyz azamattardyń MÁMS jarnalaryn da jergilikti bıýdjetten tóleý qarastyrylyp otyr.
Azamattar ózderiniń osy sanattarǵa kiretin-kirmeıtinin bilý úshin tirkelgen emhanaǵa júginýine bolady.
MÁMS júıesinde saqtandyrylǵan azamattarǵa tegin zerthanalyq taldaýlar, dárigerdiń keńesi, josparly operatsııalar, emdeý jáne ońaltý qyzmetteri qoljetimdi.
Saqtandyrý mártebesin kelesi quraldar arqyly tekserýge bolady:
• Telegram-daǵy SaqtandyryBot;
• Áleýmettik medıtsınalyq saqtandyrý qorynyń resmı saıty;
• Qoldau 24/7 mobıldi qosymshasy;
• eGov.kz portaly nemese eGov mobile qosymshasy;
• sondaı-aq keıbir ekinshi deńgeıli bankterdiń mobıldi qosymshalary.
Aıta keteıik, jaqynda Balaeva keler jyly MÁMS júıesinde ne ózgeretinin aıtty.