2026 jyldan bastap syra ónimderi tańbalanady
ASTANA. KAZINFORM – 2026 jylǵy 1 aqpannan bastap Qazaqstanda syra men syra ónimderine mindetti tańbalaý engiziledi. Bul týraly Qostanaı oblysy boıynsha Memlekettik kirister departamenti málim etti.
Vedomstvonyń málimetinshe, tańbalaý kezeń-kezeńimen júzege asyrylady. Atap aıtqanda, 2026 jylǵy 1 aqpannan bastap syra quıylǵan bóshkelerde jáne bótelkelerde shyǵarylatyn syra men syralyq sýsyndar tańbalanady. Al 2027 jylǵy 1 qańtardan bastap bankalardaǵy ónimderge tańbalaý engiziledi.
Memlekettik kirister organdary óndirýshiler men ımporttaýshylardy bul talaptarǵa aldyn ala daıyndalýǵa, tańbalaý protsesin bıznes júıesine engizýge jáne belgilengen merzimde talaptardy oryndaýǵa shaqyrady.
Belgileý jáne taýarlardyń qadaǵalaný júıesine tirkelý, kod alý jáne tehnıkalyq qoldaý máseleleri boıynsha naryq qatysýshylary biryńǵaı operatorǵa 8 800 080 65 65 nómiri arqyly habarlasa alady (qońyraý tegin).
Sondaı-aq qatysýshylar onlaın oqytý kýrstarynan óte alady:
– 10 jeltoqsan 2025 jyl (sársenbi), saǵat 11:00 – óndirýshilerge;
– 11 jeltoqsan 2025 jyl (beısenbi), saǵat 11:00 – ımporttaýshylarǵa;
– 11 jeltoqsan, saǵat 16:00 – kóterme saýda ókilderine;
– 12 jeltoqsan 2025 jyl (juma), saǵat 16:00 – bólshek saýdaǵa.
Buǵan deıin Qazaqstanda dárilik zattardy tańbalaý tetigi jańartylǵanyn jazǵanbyz.