2026 jyldan bastap sheteldikterdi jumysqa tartý erejeleri jańartylady

ASTANA. KAZINFORM — Qazaqstanda maýsymdyq sheteldik jumys kúshin tartýǵa arnalǵan kásipter tizimi keńeıtiledi, dep habarlaıdy Eńbek jáne halyqty áleýmettik qorǵaý mınıstrligi.

Eńbekmıni normatıvtik quqyqtyq aktilerge maýsymdyq sheteldik jumyskerlerdiń eńbek qyzmetin júzege asyrý úshin kásipterdiń tizbesin keńeıtý jáne olardy tartý kezinde salyq jınaýdy qaıta qaraý máseleleri boıynsha túzetýler ázirledi.

— Bul túzetýler kásipterdiń keń spektrine maýsymdyq sheteldik jumysshylardy tartýǵa, zańdy tulǵalarda jumys isteıtin eńbek ımmıgranttaryn kóleńkeli sektordan shyǵarýǵa, kóshi-qon zańnamasyndaǵy buzýshylyqtardy azaıtýǵa múmkindik beredi. Atap aıtqanda, 2026 jylǵy 1 qańtardan bastap maýsymdyq sheteldik jumysshylardyń eńbek qyzmetin júzege asyrýǵa arnalǵan kásipter tizbesine kelesi kásipterdi engizý usynylady: qurylys salasyndaǵy biliktiligi joq jumysshylar — ártúrli jumysty atqaratyn adamdar; abattandyrý sektoryndaǵy biliktiligi joq jumysshylar; qyzmet kórsetý salasyndaǵy biliktiligi joq jumysshylar, — delingen vedomstvo habarlamasynda.

Bul rette maýsymdyq sheteldik jumys kúshin tartatyn jumys berýshiler úshin salyq stavkalaryn mynadaı mólsherde belgileý usynylady:

• kúntizbelik 90 kúnge deıin — 30 aılyq eseptik kórsetkish (budan ári — AEK);
• 180 kúntizbelik kúnge deıin — 60 AEK;
• 270 kúntizbelik kúnge deıin — 90 AEK;
• 365 kúntizbelik kúnge deıin — 120 AEK.

Túzetýler jobasy týraly aqparat «Ashyq NQA» portalynda ornalastyrylǵan.

Budan buryn sheteldik jumys kúshin tartý kvotasy jyl saıyn qysqartylatyny anyqtaldy.