2026 jyldan bastap shaǵyn bızneske salyq mólsherlemesi 2%-ǵa deıin tómendeıdi
ASTANA. KAZINFORM – Qarjy mınıstrligi jańa Salyq kodeksiniń negizgi erejelerin túsindirý maqsatynda halyqpen jáne bıznes-qoǵamdastyqpen aqparattyq jumys júrgizip jatyr.
27 tamyz kúni Shymkentte jańa Salyq kodeksiniń 2026 jyldan bastap kúshine enetin normalary talqylanǵan kóshpeli semınar uıymdastyryldy. Іs-sharaǵa Qarjy mınıstrligi Memlekettik kirister komıteti tóraǵa orynbasary Janybek Nurjanov pen salyq ákimshilendirý máselelerine jaýapty komıtet sarapshylary qatysty.
Shymkent qalasynda 26 myńǵa jýyq shaǵyn jáne orta bıznes sýbektisi jumys isteıdi. Óńirdiń óndiristik sektory jalpy óńirlik ónimniń tórtten birin quraıdy, al qyzmet kórsetý salasynyń úlesi shamamen 70 paıyzdy quraıdy. Munda hımııa, tústi metallýrgııa, munaı-hımııa óńdeý jáne mashına jasaý salalaryndaǵy iri kásiporyndar shoǵyrlanǵan.
Semınarda kásipkerler eń aldymen arnaıy salyq rejımderiniń sanyn úshke deıin qysqartý máselesine nazar aýdardy. Bul jańashyldyq salyq esebin júrgizýdi jeńildetip, bıznes úshin ákimshilendirýdi ońtaılandyrady. Sonymen qatar ózin-ózi jumyspen qamtyǵan azamattar jylyna 4080 AEK-ke deıingi tabysyn zańdy túrde rásimdep, tabys salyǵyn tólemeı, tabysynyń 4 paıyzy mólsherinde áleýmettik jarna aýdarýǵa múmkindik alady. Shaǵyn bızneske arnaıy salyq rejımi usynylyp, onyń eń joǵarǵy mólsherlemesi 4 paıyz bolyp belgilendi, belgili bir sharttar oryndalǵanda ol 2 paıyzǵa deıin tómendeıdi.
«Jańa Salyq kodeksi kásipkerlerdiń jumysyn edáýir jeńildetedi. Esep berý kólemi shamamen úshten birge qysqarady, deklaratsııa jylyna bir ret qana tapsyrylady. Erejelerdiń saqtalýyn avtomattandyrylǵan táýekelderdi baǵalaý júıesi baqylaıdy. Shaǵyn qaryzdar úshin kásiporyndardyń shottaryn avtomatty túrde buǵattaý tájirıbesi toqtatyldy. Munyń bári bıznesti júrgizýdi yńǵaıly etip, ekonomıkalyq ósimdi yntalandyrady», – dedi Memlekettik kirister komıteti tóraǵa orynbasary Janybek Nurjanov.
Jańa Salyq kodeksiniń erejeleri jeke sektordyń damýyna qolaıly jaǵdaı jasaıdy, ákimshilik kedergilerdi azaıtady jáne Qazaqstannyń salyq júıesine degen senimdi arttyrýǵa yqpal etedi.
Aıta keteıik, Qazaqstanda salyqtyq tirkeýdiń jańa qaǵıdalary usynyldy.