2026 jyldan bastap salyq tólemegen sheteldik platformalar buǵattalýy múmkin
ASTANA. KAZINFORM — QQS tólemegen sheteldik onlaın-kompanııalar buǵattalýy múmkin, sebebi 2026 jyldan bastap jańa ereje kúshine enedi, dep habarlaıdy Memlekettik kirister komıteti.
Qarjy mınıstrliginiń Memlekettik kirister komıteti sheteldik ınternet-kompanııalarǵa qatysty qosylǵan qun salyǵyn (QQS) ákimshilendirýdiń qazirgi nátıjeleri, sondaı-aq 2026 jylǵy 1 qańtardan bastap kúshine enetin jańa sharalar týraly túsinikteme jasady.
Sheteldik ınternet-kompanııalardy tirkeý
— Qazaqstanda sheteldik ınternet-platformalarǵa QQS engizilgen sátten bastap 116 kompanııa shartty tirkeýden ótti. Bul shara tsıfrlyq ekonomıkanyń álemdik iri oıynshylaryn salyq órisine tartýǵa múmkindik berdi, — dep atap ótti komıtet.
2025 jyly 18 jańa sheteldik kompanııa tirkeldi, bul salyqtyq ákimshilendirýdiń qamtý aýqymynyń óskenin kórsetedi. Olardyń qatarynda:
- com — halyqaralyq onlaın-shahmat platformasy,
- OpenAI, L.L.C. — jasandy ıntellekt servısi ChatGPT ázirleýshisi jáne ıesi,
- Canva Pty Ltd. — halyqaralyq grafıkalyq dızaın onlaın-platformasy,
- «Okko» JShQ — Reseıdiń onlaın-telearna jáne kıno servısi.
Atalǵan kompanııalardyń salyq tóleýshiler tizimine enýi otandyq jáne sheteldik tsıfrlyq qyzmet jetkizýshiler úshin salyq salýda teń jaǵdaı jasaý boıynsha júrgizilip jatqan jumystyń tıimdiligin dáleldeıdi.
Bıýdjetke túsimder
— Salyq engizilgen kúnnen bastap sheteldik ınternet-kompanııalar Qazaqstan Respýblıkasynyń bıýdjetine 111,6 mlrd teńge tóledi. Tek 2025 jyldyń ózinde túsimder 41,8 mlrd teńgeni qurady, bul 2024 jylǵy kórsetkishpen (23 mlrd teńge) salystyrǵanda 18 mlrd teńgege kóp, — dep túsindirdi vedomstvo.
2025 jylǵy iri salyq tóleýshilerdiń qataryna mynalar kirdi:
- Temu — 6,2 mlrd teńge,
- Valve Corporation — 5,3 mlrd teńge,
- Apple — 5,2 mlrd teńge.
Bul kompanııalar bıýdjet kiristerin qalyptastyrýǵa eleýli úles qosty, bul tsıfrlyq sektordyń ulttyq ekonomıka úshin mańyzdylyǵyn aıqyndaıdy.
Sondaı-aq Qazaqstan bıýdjetine salyq tóleı bastaǵan jańa sheteldik ınternet-kompanııalardyń ishinde erekshe atap ótýge bolady:
- Next Retail Ltd. — halyqaralyq onlaın-kıim jáne aksessýarlar rıteıleri, 283 mln teńge tóledi,
- com — eń iri saýda ınternet-platformasy, 142 mln teńge tóledi.
Atalǵan kompanııalardan túsken salyq túsimderi transshekaralyq elektrondyq saýdanyń barǵan saıyn kóbirek qatysýshylaryn qamtıtynyn kórsetedi.
2026 jyldan bastap jańa sharalar
Salyq tártibin kúsheıtý jáne adal salyq tóleýshilerdiń múddelerin qorǵaý maqsatynda 2026 jylǵy 1 qańtardan bastap jańa sharalar engiziledi. Atap aıtqanda:
- QQS tóleýden jaltarǵan nemese shartty tirkeý mindetin oryndamaǵan sheteldik ınternet-kompanııalarǵa Qazaqstan Respýblıkasynyń aýmaǵynda buǵattaý sharalary qoldanylady,
- mundaı kompanııalardyń tizimi ýákiletti organmen qalyptastyrylyp, resmı ınternet-resýrsta ashyq túrde jarııalanady.
Mınıstrliktiń málimetinshe, atalǵan sharalardy qabyldaý ádil básekelestik ortasyn qalyptastyrýǵa, bıznes júrgizý úshin teń jaǵdaılardy qamtamasyz etýge jáne Qazaqstannyń tsıfrlyq ekonomıkasyn odan ári damytýǵa baǵyttalǵan.
Budan buryn Memlekettik kirister komıteti tóraǵasynyń orynbasary Jánibek Nurjanov QQS-tan bosatylatyn nysandarǵa qatysty túsinik berdi.