2026 jyldan bastap Nazarbaev ýnıversıteti, MÁMS pen AHQO-ny qarjylandyrý mehanızmi ózgeredi
ASTANA. KAZINFORM – 2026 jylǵy 1 qańtardan bastap bilim berý, densaýlyq saqtaý jáne qarjy salasyndaǵy birqatar kvazımemlekettik uıymdy qarjylandyrý mehanızmi kúsheıtiledi. Bul týraly Joǵary aýdıtorlyq palata habarlaıdy.
Bıýdjet kodeksine qajetti ózgerister engizý protsesi respýblıkalyq bıýdjettiń shoǵyrlandyrylǵan qarjylyq eseptiligine (ShQE) júrgizilgen memlekettik aýdıtten keıin bastaldy. Aýdıtorlar memlekettik mekemeler bolyp tabylmaıtyn uıymdardy nysanaly salymdar men nysanaly aýdarymdardyń kómegimen qarjylandyrý múmkindigi memleket aktıvteriniń shoǵyrlandyrylǵan qarjylyq eseptiligine kórsetilý sapasy men durystyǵyna teris áser etetinin anyqtady.
- Osyndaı mehanızm arqyly jyl saıyn «Nazarbaev ýnıversıteti» jáne «Nazarbaev zııatkerlik mektepteri» derbes bilim berý uıymdary, Áleýmettik medıtsınalyq saqtandyrý qory, «Astana» halyqaralyq qarjy ortalyǵy jáne basqa da birqatar uıym qarjylandyrylady. Joǵary aýdıtorlyq palata Úkimetke qarjylandyrý tásilin ózgertý múmkindigin qaraýdy usyndy, óıtkeni qoldanystaǵy mehanızm memleket aktıvteriniń ósýine yqpal etpeıdi (zańdy tulǵalardyń jarǵylyq kapıtaldarynyń ulǵaıýy joq) jáne qarajatty jumsaýdyń ashyqtyǵyn qamtamasyz etpeıdi, - delingen habarlamada.
Aqparatta aıtylǵandaı, jańa Bıýdjet kodeksinde nysanaly salymdar men aýdarymdar kómegimen qarjylandyrýdy kózdeıtin normalar alyp tastaldy. Onyń ornyna zańdy tulǵalarǵa beriletin transfertter engiziledi. Transfertter olardy alýǵa úmitker uıymdar ózderiniń strategııalyq qujattarynda naqty nátıjelerdi josparlaǵan jaǵdaıda bólinedi.
- Zańda kózdelgen jekelegen jaǵdaıdy almaǵanda, jyl ishinde bólingen jáne paıdalanylmaǵan qarajat bıýdjetke qaıtarylady. Transfertter alatyn zańdy tulǵalardyń birinshi basshylary memlekettik organdardyń damý josparlarynda, ózderiniń uzaq merzimdi strategııalarynda jáne tıisti bıýdjettik baǵdarlamalardyń pasporttarynda aıqyndalǵan nátıjelerge qol jetkizýge jaýapty bolady. Sonymen qatar olar qarajatty paıdalaný týraly esepterdiń negizdiligi men durystyǵyna jaýap beredi, - dep habarlap otyr Joǵary aýdıtorlyq palata.
Atalǵan ózgerister 2026 jylǵy 1 qańtardan bastap kúshine enedi.
Jyl basynda Joǵary aýdıtorlyq palatanyń tóraǵasy Álıhan Smaıylov Memleket basshysyna esep berý barysynda bıýdjetke 135 mlrd teńge qaıtarylǵanyn habarlaǵan edi.