2026 jyldan bastap medıtsınalyq qyzmetter men dári-dármekter QQS-tan bosatylady
ASTANA. KAZINFORM — Qazaqstanda tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý sheńberinde usynylatyn medıtsınalyq qyzmetter men dárilik preparattardy qosylǵan qun salyǵynan bosatý josparlanyp otyr. Bul týraly DSM baspasóz qyzmeti habarlady.
Úkimet qaýlysynyń tıisti jobasyn Densaýlyq saqtaý mınıstrligi 2026 jylǵy qańtardan bastap kúshine enetin Qazaqstan Respýblıkasynyń jańa Salyq kodeksin iske asyrý sheńberinde ázirledi.
Jobada medıtsınalyq qyzmetter men dárilik zattardyń tizbesin bekitý kózdeledi, olardyń ótkizilýi men ımporty QQS-tan bosatylady.
Shara sonymen qatar orfandyq jáne áleýmettik máni bar aýrýlardy emdeýge, dıagnostıkalaýǵa, profılaktıkalaýǵa jáne ońaltýǵa qoldanylady.
Qaýlyny qabyldaý:
● QQS eskermeı TMKKK jáne MÁMS sheńberinde medıtsınalyq qyzmetter kórsetýge;
● sırek kezdesetin jáne áleýmettik máni bar aýrýlardy emdeýge arnalǵan dári-dármekterdi qosa alǵanda, dári-dármekterdi salyqtan bosatýǵa;
● dárilik zattardy túpkilikti tutynýshylarǵa ótkizgenge deıin olardy ákelýge QQS boıynsha jeńildik belgileýge múmkindik beredi.
Bul sheshim patsıentterdi qoldaýǵa jáne medıtsınalyq kómektiń qoljetimdiligin arttyrýǵa baǵyttalǵan. QQS-tan bosatý medıtsınalyq uıymdar úshin qarjylyq júktemeni azaıtýǵa, patsıentter úshin múmkindikterdi keńeıtýge jáne otandyq farmatsevtıkalyq kompanııalar úshin qolaıly jaǵdaılar jasaýǵa múmkindik beredi.
Bul rette jeńildikter TMKKK, MÁMS tizbesine kirmeıtin nemese ýákiletti organ bekitken orfandyq jáne áleýmettik máni bar aýrýlardy emdeýge jatpaıtyn qyzmetter kórsetetin jeke medıtsınalyq uıymdarǵa qoldanylmaıdy.
Budan basqa, jeke sektorda medıtsınalyq qyzmetter kórsetý, dárilik zattar men medıtsınalyq buıymdardy ótkizý úshin QQS-tyń tómendetilgen mólsherlemesi — 2026 jyldan bastap 5% jáne 2027 jyldan bastap 10% bolyp belgilendi.
Bul sheshim densaýlyq saqtaý júıesin jetildirý jáne halyqty áleýmettik qorǵaýdy nyǵaıtý jónindegi keshendi sharalardyń bir bóligi.
Aıta ketelik tirkelmegen dári-dármek ákelýge arnalǵan elektrondy ruqsattyń jańa formasy engizildi.