2026 jyldan bastap korporatıvtik tabys salyǵynyń saralanǵan stavkalary engiziledi
ASTANA. KAZINFORM — 2026 jyldan bastap korporatıvtik tabys salyǵynyń saralanǵan stavkalary engiziledi. Bul týraly Úkimet otyrysynda Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.
— Naqty sektorǵa kredıt berýdi keńeıtý maqsatynda agenttik Ulttyq bankpen jáne Úkimetpen birlesip júıeli sharalar qabyldady. Salyq kodeksi aıasynda fıskaldyq yntalandyrý úshin ótken jyly Ulttyq banktiń notalaryna korporatıvtik tabys salyǵy engizildi. Bıyl memlekettik baǵaly qaǵazdardan jáne basqa da ótimdiligi joǵary aktıvterden bankterdiń kiristerine salyq salýdyń erekshe tártibi engizildi. 2026 jyldan bastap korporatıvtik tabys salyǵynyń saralanǵan stavkalary engiziledi: korporatıvtik kredıtteý boıynsha 20 paıyz, tutynýshylyq kredıtter jáne basqa da qyzmet túrleri boıynsha 25 paıyz. Bankterdiń kapıtalyn jáne ótimdiligin bosatý úshin shaǵyn jáne orta bıznes qaryzdary boıynsha jáne sındıkattalǵan qaryzdar boıynsha táýekel-saralaý 50 paıyzǵa deıin, ótimdilik normatıvteri 0,9-ǵa deıin tómendetildi. Bul 2,6 trln teńge kóleminde ótimdilikti bosatty, — dedi agenttik basshysy.
Onyń aıtýynsha, bankterdiń kepil saıasatyn jeńildetý úshin jyljymaıtyn múlik jáne jer ýchaskeleri boıynsha ótimdilik koeffıtsıentteri arttyryldy. Memlekettik-jekeshelik áriptestik sharttary men ofteık-kelisimsharttar turaqty kepil bolyp tanyldy.
— Bıyl maýsymda Damý qorynyń bazasynda shaǵyn jáne orta bıznes kredıtteri boıynsha Kepildik berý qoryn qurý týraly zańnamalyq túzetýler qabyldandy. Qor bankterdiń 40 paıyz kólemindegi jarnalary esebinen qarjylandyrylady. Búgingi kúni 330 mlrd teńgege 1 892 kepildik berildi. Іri ınvestıtsııalyq jobalarǵa kredıt berý úshin zańnamalyq deńgeıde sındıkattalǵan kredıtteýdi damytý jóninde sharalar qabyldandy. Báıterek qory janynan Sındıkattalǵan kredıt berý jónindegi jobalyq keńse quryldy. Jalpy somasy 1,9 trln teńgege jobalardy qarjylandyrý bastaldy. Bankterge uzaq merzimdi qorlandyrýdy berý úshin byltyrdan bastap bankterdiń oblıgatsııalaryna Biryńǵaı jınaqtaýshy zeınetaqy qorynyń zeınetaqy aktıvterin ınvestıtsııalaý tetigi iske qosyldy. Bankter naqty sektordaǵy 85 jobaǵa kredıt berý úshin 207 mlrd teńge tartty, — dedi Mádına Ábilqasymova.
Aıta keteıik, Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimettiń ınflıatsııany tejeý sharalaryn atady.