2026 jyldan bastap Qytaıǵa baratyn qazaqstandyq kólikterge ruqsat shekteýsiz beriledi

ASTANA. KAZINFORM – 5-6 qarasha kúnderi «Qorǵas» shekara mańy yntymaqtastyǵy halyqaralyq ortalyǵynda Qazaqstan Respýblıkasy Kólik mınıstrligi men Qytaı Halyq Respýblıkasynyń Kólik mınıstrligi ókilderiniń halyqaralyq avtomobıl tasymaldary máselelerine qatysty kezdesýi ótti. Bul týraly Kólik mınıstrliginiń baspasóz qyzmeti habarlady. 

Qazaqstandyq delegatsııa quramyna QR QM Memlekettik kirister komıtetiniń, «Qazaqstan halyq banki» AQ, «Aqparattyq-eseptik ortalyq» AQ jáne tasymaldaýshylar qaýymdastyǵynyń ókilderi kirdi.

Kelissózderdiń nátıjesinde taraptar kelesi kelisimderge qol jetkizdi:

• 6-12 qarasha aralyǵynda Qytaı tarapy Qazaqstanǵa 15 myń ruqsat blankilerin beredi. Osylaısha jeti kúnniń qorytyndysy boıynsha qazaqstandyq tasymaldaýshylardyń táýliktik naqty qajettiligi aıqyndalady. Alynǵan derekterdiń negizinde bolashaqta ruqsat blankileri kún saıyn beriletin bolady.

• 2026 jyldan bastap ruqsat blankilerin sandyq shekteýsiz, ıaǵnı sheksiz túrde berý júıesine kóshý josparlanyp otyr. Osylaısha Qytaıǵa elektrondy kezek júıesi arqyly kiretin barlyq kólik quralyna, QHR zańnamasyn buryn buzbaǵan jaǵdaıda, ruqsattar avtomatty túrde beriletin bolady.

Atap ótý qajet, 2024 jyly qazaqstandyq tasymaldaýshylar 228 myń ruqsat blankilerin paıdalanǵan, al aǵymdaǵy jyldyń basynan beri 230 myńnan astam qytaılyq ruqsat blankileri alynǵan jáne paıdalanylǵan. 

Aıta ketelik Qorǵas keden beketi arqyly júk aınalymy alty aıda 20 mln tonnadan asty.