2026 jyldan bastap qazaqstandyqtar jeke kýálikti tegin alady
ASTANA. KAZINFORM — 2026 jylǵy 1 qańtardan bastap Qazaqstan azamattary jeke kýálikti alǵash ret alǵan kezde jáne onyń jaramdylyq merzimi aıaqtalǵan soń aýystyrǵan jaǵdaıda memlekettik baj salyǵyn tólemeıdi. Bul týraly Polisia.kz jazdy.
Qazaqstan Respýblıkasy Іshki ister mınıstrligi qujattandyrý salasynda tsıfrlandyrýdy belsendi túrde engizip keledi. Qazirgi tańda pasporttardy elektrondy túrde rásimdeý múmkindigi tek el ishinde ǵana emes, shetelderde de qoljetimdi. Bul qyzmet 71 eldegi 99 sheteldik mekemede iske asyrylǵan. Shetelde júrgen qazaqstandyqtar endi pasportty burynǵydaı 6 aı kútpeı, nebári 30 kún ishinde ala alady. Azamattarǵa barynsha qolaıly jaǵdaı jasaý úshin qujattardy berý úderisin jeńildetý jáne tsıfrlandyrý jumystary aldaǵy ýaqytta da jalǵasyn tabady.
Kóshi-qon qyzmeti komıtetiniń tóraǵasy Aslan Atalyqovtyń aıtýynsha, Qazaqstanda halyqty qujattandyrýdyń biryńǵaı júıesi jumys isteıdi. Bul júıe arqyly azamattarǵa jeke sáıkestendirý nómiri (JSN) beriledi, jeke kýálik pen pasporttar rásimdeledi, sondaı-aq azamattardy tirkeý (turǵylyqty mekenjaı boıynsha tirkeý) júzege asyrylady.
2026 jylǵy 1 qańtardan bastap jeke kýálikterdi alǵash ret alý jáne onyń qoldaný merzimi aıaqtalǵannan keıin aýystyrý tolyǵymen tegin bolady. ІІM bastamasymen engizilgen bul biregeı tájirıbe qujat alý rásimin jeńildetip, azamattardyń qarjylyq júktemesin azaıtýǵa baǵyttalǵan.
— Alǵash ret beriletin jeke kýálikter tegin bolady. Sonymen qatar, jeke kýálik merzimi aıaqtalǵan jaǵdaıda ony aýystyrý kezinde de memlekettik baj alynbaıdy, — dep qorytyndylady spıker.
Aıta keteıik, Qazaqstanda jeke kýálikti onlaın túrde rásimdeýge múmkindik bar.