2026 jyldan bastap Qazaqstanda zeınetaqy jarnalaryn tóleý tártibi ózgeredi
ASTANA. KAZINFORM – Úkimet mindetti jáne kásiptik zeınetaqy jarnalaryn esepteý men aýdarýdyń jańa erejelerin bekitti. Qaýly 2026 jyldyń 1 qańtarynan bastap kúshine enedi.
Túzetýlerge sáıkes, endi kásiptik zeınetaqy jarnalary qyzmetkerdiń aı saıynǵy tabysynyń barlyq túrinen, ıaǵnı Salyq kodeksinde kózdelgen kiristerdiń negizinde esepteledi. Degenmen salyq salýdan bosatylǵan tólemder bul esepke kirmeıdi.
– Ózgerister ózin-ózi jumyspen qamtyǵan azamattarǵa, jeke kásipkerlerge jáne ınternet-platforma arqyly tabys tabatyn tulǵalarǵa da qatysty. Olar úshin Biryńǵaı jınaqtaýshy zeınetaqy qoryna jarnalardy esepti aıdan keıingi aıdyń 25-inen keshiktirmeı aýdarý tártibi men merzimi belgilendi, - delingen qujatta.
Sonymen qatar jarnalardy ýaqtyly tóleýdi baqylaý tetikteri kúsheıtildi. Eger mindetti nemese kásiptik zeınetaqy jarnalary boıynsha bereshek 6 aılyq eseptik kórsetkishten (AEK) asyp ketse, memlekettik kirister organdary 5 jumys kúni ishinde qaryz týraly habarlama jiberedi.
Qaryz ótelmegen jaǵdaıda, habarlama tapsyrylǵannan keıingi 10 jumys kúni ishinde boryshkerdiń shottary men kassalyq operatsııalary boıynsha shyǵys operatsııalary ýaqytsha toqtatylýy múmkin.
Sondaı-aq zııandy eńbek jaǵdaıynda jumys isteıtin qyzmetkerlerdiń eńbegin paıdalanatyn jumys berýshiler burynǵydaı óz qarajaty esebinen kásiptik zeınetaqy jarnalaryn aı saıyn aýdarýǵa mindetti bolyp qala beredi.
Buǵan deıin zeınetaqy jınaǵyn ıpotekanyń negizgi qaryzyn jabý úshin paıdalanýǵa bolatynyn jazǵanbyz.