2026 jyldan bastap qaryzy 106 mln teńgeden asqan kásipkerler shetelge shyǵa almaıdy
ASTANA. KAZINFORM – Memlekettik kirister komıteti Aýdıt departamenti bereshekpen jumys basqarmasynyń basshysy Aryn Qaısar jańa Salyq kodeksinde qaryzy bar kásipkerlerdi bultartpaý sharasy qalaı qoldanylatynyn túsindirdi.
- Qoldanystaǵy zańnama boıynsha zańdy tulǵalar bir-birine 45 aılyq eseptik kórsetkishten (194 625 teńgeden) joǵary mólsherde qaryz bolǵan jaǵdaıda jeke kásipkerler men kompanııanyń birinshi basshylaryna Qazaqstannan shyǵýǵa shekteý qoıylady. Osy normaǵa da jańa Salyq kodeksinde ózgeris engizip otyrmyz. Depýtattardan da sondaı usynystar tústi. Sonyń bárin qarastyra kelip, qaryz somasyn 27 AEK-ke deıin kóterdik. 106 mln teńgeden joǵary qaryzy bar jeke kásipkerler men zańdy tulǵalardyń birinshi tulǵalary ǵana Qazaqstannan shyǵýǵa tyıym salynady, - dedi ol onlaın baspasóz máslıhatynda.
Aıtýynsha, bul shekteýdiń ózi sottyń sanktsııasy arqyly iske asady.
- Bul shekteýdi ýaqytsha toqtata turý múmkindikteri de qarastyrylǵan. Qaryzy bar tulǵa shetelde shuǵyl emdelýi kerek bolǵan jaǵdaıda shekteý qoıylmaıdy. Biraq «emdelýge jiberý kerek» degen sheshimdi sot qana qabyldaı alady.
Eske salsaq, Memleket basshysy Qasym-Jomart Toqaev bıylǵy Joldaýynda salyq bereshegi barlardyń banktegi esep-shotyn tolyq buǵattamaýdy tapsyrǵan bolatyn.
- Bereshek somasy tym kóp bolǵan jaǵdaıda, kepilge múlik qoıýdy talap etpeı, qaryzdy bólip tóleýge múmkindik bergen jón. Josparǵa saı tekserý tásilinen birjola bas tartýǵa tyrysý kerek, - degen edi Prezıdent.