2026 jyldan bastap Frantsııa men Koreıa ýnıversıtetteri elde AES mamandaryn daıarlaıdy

ASTANA. KAZINFORM – Qazaqstanda ıadrolyq energetıka salasyna maman daıarlaý jumystary júıeli júrgizilip jatyr. Bul týraly Ǵylym jáne joǵary bilim mınıstri Saıasat Nurbek málim etti.

- Kadr daıarlaýdy birden qolǵa aldyq. Qazirdiń ózinde birneshe ulttyq ýnıversıtet bazasynda – ál-Farabı atyndaǵy Qazaq ulttyq ýnıversıteti, Sátbaev ýnıversıteti, sondaı-aq Shyǵys Qazaqstan men Túrkistandaǵy joǵary oqý oryndarynda arnaıy baǵdarlamalar ashyldy. Bıyldan bastap Shyǵystaǵy ýnıversıtet MAGATE bekitken baǵdarlama negizinde bilim berýdi qolǵa aldy, – dedi mınıstr.

Onyń aıtýynsha, 2026 jyly Frantsııadaǵy atom elektr energetıkasy salasynda aldyńǵy qatarda turǵan Grenobl ýnıversıtetiniń fılıaly ashylady. Sondaı-aq Koreıanyń KAIST ulttyq zertteý ınstıtýtyn ashý josparlanyp otyr. Bul oqý ornynda ıadrolyq fızıka baǵyty boıynsha daıyndyq júrgiziledi.

- Qajetti deńgeıde ınjenerlerdi, ıadro salasynyń mamandaryn daıyndaımyz. Bul baǵytta tek Reseıdiń ǵana emes, AQSh, Frantsııa jáne Qytaıdyń da tájirıbesin qoldanamyz, – dep atap ótti Saıasat Nurbek.

Buǵan deıin Atom energııasy jónindegi agenttik tóraǵasy Almasadam Sátqalıev Halyqaralyq atom energııasy agenttigi (MAGATE) Abaı oblysynda AES salý ıdeıasyn maquldaǵanymen túpkilikti sheshim áli qabyldanbaǵanyn aıtqan bolatyn.