2026 jyldan bastap dzıýdo elementteri Keleshek mektepterinde engiziledi
ASTANA. KAZINFORM – Aldaǵy jyldan bastap dzıýdo elementteri Keleshek mektepterinde úıirme retinde engiziledi.
QR Oqý-aǵartý mınıstri Juldyz Súleımenova Azııa dzıýdo odaǵy prezıdentiniń keńesshisi, birneshe dúrkin álem chempıony Aıdar Mahmetov pen «Jeńis» sport klýbynyń bas dırektory Tımýr Tursynbaevty qabyldady.
Kezdesý barysynda 2026 jyldan bastap pılottyq negizde «Keleshek mektepterinde» dzıýdo sport túrin sektsııalyq formatta iske qosý perspektıvasy talqylandy.
Esterińizge sala keteıik, Qazaqstanda Memleket basshysynyń tapsyrmasymen «Keleshek mektepteri» ulttyq jobasynyń aıasynda salynyp jatqan 217 jańa formattaǵy mektepterde 460 myńnan astam oqýshy bilim alady. Búginde bul jańashyl formattaǵy mektepter qazaqstandyq bilim berý júıesiniń ınfraqurylymdyq jańarýynyń jáne bilim berýdegi ınnovatsııalardy engizýdiń avangardyna aınaldy.
- Keleshek mektepterinde sapaly bilim, sanaly tárbıe berýmen qatar, shyǵarmashylyq, zııatkerlik, sporttyq úıirmeler arqyly balalardyń boıynda synı oılaý, basqarýshylyq, taktıkalyq sheshim qabyldaý, fızıkalyq damý, ózine talap qoıý, tártipke baǵyný, shydamdy bolý jáne tózimdilikti damytý, jeńiske umtylý daǵdylaryn erte jastan qalyptastyrýǵa da basymdyq berilýi tıis. Sońǵy jyldary dzıýdoǵa qazaqstandyqtardyń qyzyǵýshylyǵy artyp, ol tanymal sport túrine aınalyp keledi. Sondyqtan mınıstrlik federatsııamen yntymaqtastyqta jumys jasaýǵa nıetti, - dedi Oqý-aǵartý mınıstri Juldyz Súleımenova.
Óz kezeginde dzıýdo federatsııasynyń ókilderi 217 «Keleshek mektebinde» ashylatyn dzıýdo úıirmeleri úshin jattyqtyrýshylardy kásibı daıyndaýdy, sonymen birge mektep zaldaryn qajetti sporttyq qural-jabdyqtarmen, qatysýshy oqýshylardy arnaıy kımonomen qamtamasyz etýdi óz mindetterine alatyndaryn jetkizdi.
Aıta ketý kerek, jobany júzege asyrýda ásirese, aýyl mektepterine basymdyq beriledi.
Buǵan deıin AI taqyryptary Keleshek mektepteriniń oqý baǵdarlamasyna engizilgenin jazǵan edik.