2026 jyldan bastap barlyq azamat onkoskrınıngten tegin óte alady
ASTANA. KAZINFORM — Elordada 250 myńnan astam azamat MÁMS júıesine tirkelmegen. Olardyń 15,6 paıyzy áleýmettik ál-aýqaty tómen adamdar.
– Bizdiń basty maqsatymyz – áleýmettik mártebesine qaramastan halyqty MÁMS júıesimen barynsha qamtý. Bul aýrýlardy erte anyqtaýǵa múmkindik beredi. Biryńǵaı paket áleýmettik mańyzy bar aýrýlardy erte dıagnostıkalaý arqyly aldyn alýǵa múmkindik beredi. Mysaly, onkologııalyq skrınıngter MÁMS mártebesine qaramastan barlyq qazaqstandyq úshin qoljetimdi bolady. Tegin medıtsınalyq kómektiń kepildik berilgen kólemi aıasynda onkoskrınıngterdiń jalpyǵa qoljetimdi bolýy qaterli isikterdi erte satysynda der kezinde ári tıimdi anyqtaýǵa jaǵdaı jasaıdy. Aıta ketý kerek, qazirgi ýaqytta TMKKK sheńberinde dıagnostıka tek týberkýlez ben AITV-ınfektsııasy boıynsha ǵana júrgiziledi, – deıdi «Astana qalasynyń Qoǵamdyq densaýlyq saqtaý basqarmasy» MM basshy orynbasarynyń m.a. Farıda Týlesheva «MÁMS aıasyndaǵy ózgerister týraly» brıfıngide.
Sonymen qatar áleýmettik mańyzy bar aýrýlarǵa kúdik týyndaǵan jaǵdaıda tegin tekserýler júrgiziledi.
– 2026 jyldyń 1 qańtarynan bastap MÁMS aıasynda áleýmettik mańyzy bar aýrýlardyń jańartylǵan tizimi kúshine enedi. Bul tizimge 11 nozologııa kiredi, olardyń qatarynda: týberkýlez, AITV, sozylmaly vırýstyq gepatıtter men baýyr tsırrozy, qaterli isikter, psıhıkalyq jáne minez-qulyqtyq buzylystar, orfandyq aýrýlar, jedel mıokard ınfarktisi, balalar tserebraldy sal aýrýy, júıke júıesiniń degeneratıvti aýrýlary, ortalyq júıke júıesiniń demıelınızatsııalaýshy aýrýlary, tserebrovaskýlıarlyq aýrýlar, ınsýlt, epılepsııa bar, – deıdi spıker.
Aıta ketý kerek, qazirgi tańda elordada 1,4 mıllıon adam saqtandyrylǵan, bul halyqtyń 84,4 paıyzy. Qalǵan 15,6 paıyzy MÁMS júıesine tirkelmegen. Olardyń ishinde 207 myń azamat – turmystyq jaǵdaıy jaqsy adamdar, al shamamen 56 myń adam áleýmettik ál-aýqaty shuǵyl jáne daǵdarystyq deńgeıdegi turǵyndar, D jáne E sanattaryna jatatyndar.
Buǵan deıin keler jyly MÁMS júıesinde taǵy ne ózgeretini týraly jazǵan edik.