2026 jyldan bastap balalar-jasóspirimder sport mektepteriniń jattyqtyrýshylaryna 30 paıyz qosymsha aqy tólenedi

ASTANA. KAZINFORM – 2026 jylǵy 1 qańtardan balalar-jasóspirimder sport mektepteriniń jattyqtyrýshy-oqytýshylaryna 30 paıyz qosymsha aqy tólenedi. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- 2022 jyldan beri Úkimettiń qaýlysyna sáıkes azamattyq qyzmetshilerdiń jalaqysy jyl saıyn 20 paıyzǵa ósirilýde. Sonymen qatar 2026 jylǵy 1 qańtardan bastap, balalar-jasóspirimder sport mektepteriniń jattyqtyrýshy-oqytýshylaryna biliktilik sheberligi úshin laýazymdyq jalaqysyna 30 paıyz kóleminde qosymsha aqy tóleýge 2025-2028 jyldarǵa arnalǵan respýblıkalyq bıýdjet jobasynda 1,8 mlrd teńge qarastyrylǵan. Qazirgi tańda Úkimettiń qaýlysyna tıisti tolyqtyrýlar ázirlenip, kelisý satysynda, - dedi Úkimet basshysy.

Premer-mınıstr munan bólek, qoldanystaǵy zańnamaǵa sáıkes respýblıkalyq mańyzy bar qalalar, oblystyq ákimdikter jergilikti bıýdjet qarajatynan sport salasyndaǵy qyzmetkerlerge ústemeaqy taǵaıyndaýǵa jáne aýyldyq jerde jumys isteıtin sport salasy mamandaryna laýazymdyq jalaqynyń keminde 25 paıyzyn quraıtyn kóterińki laýazymdyq jalaqy tóleýge múmkindikteri bar ekenin atap ótedi.

Buǵan deıin otandyq fýtbol klýbtaryn satyp alýǵa nıetti kásipkerler belgili bolǵanyn jazǵan edik.

Aıta keteıik, osy jyldyń naýryzynda Býrabaıda ótken Ulttyq quryltaıdyń 4-otyrysynda Memleket basshysy fýtbol klýbtary oblystyq bıýdjetterge ǵana arqa súıemeı, shetelderdegi sekildi ózderi de tabys tabýdy úırenýi kerektigin aıtqan edi.

Osydan keıin Týrızm jáne sport mınıstrligi otandyq fýtbol klýbtaryn jekeshelendirý boıynsha keshendi jol kartasy ázirledi.