2026 jyldan bastap Almatyda jańarmaǵan bazarlardyń jumysy toqtaıdy
ALMATY. KAZINFORM — Almatyda zamanaýı bazarlarǵa kóshý kezeńi bastaldy. Bul týraly Almaty ákiminiń orynbasary Oljas Smaǵulov aıtty.
— Bizdiń maqsatymyz — bazarlardy qaıta salý ǵana emes, qaýipsiz jáne qolaıly saýda keńistigin qalyptastyrý. Munda bıznes damyp, qala turǵyndary ózin jaıly sezinýi tıis. Bul satyp alýshylardy, kásipkerlerdi jáne qalanyń ózin qorǵaýǵa baǵyttalǵan «Saýda qyzmetin retteý týraly» zań talaby, — dedi Oljas Smaǵulov.
Onyń aıtýynsha, búginde Almatyda 29 bazar tolyqtaı jańǵyrtyldy: olardyń aýmaǵynda kúrdeli qurylystar salyndy, ınjenerlik ınfraqurylym aýystyryldy. Taǵy 21 bazar jańǵyrtylyp jatyr, ol jumys 2026 jyldyń sońyna deıin aıaqtalady. Eskirgen «Jibek joly» bazarynyń ornyna jańa menshik ıesi zamanaýı turǵyn úı kesheni men saýda ortalyǵyn salady.
Qala ákimdiginiń málimetinsha, jalpy keıingi jyldary qaladaǵy bazarlardyń sany 59-dan 51-ge deıin azaıǵan.
— Ákimdik kásipkerlerdiń alańdaýshylyǵyn túsinedi. Jalǵa alýa baǵasynyń ósýi tabysty arttyrý maqsatynda emes, qaıta jańǵyrtýdan keıingi paıdalaný men kommýnaldyq shyǵyndardyń kóbeıýine baılanysty bolyp otyr. Sebebi jańartylǵan bazarlar ortalyqtandyrylǵan jylý, sý jáne káriz júıelerine qosylady, sanıtarlyq talaptar men abattandyrylǵan aýmaq qamtamasyz etiledi. Rekonstrýktsııa kezeńinde jalǵa alýshylarǵa saýda oryndary ýaqytsha jeńildikpen beriledi, — dedi ol.
Sondaı-aq Almaty ákimdigi Ákimshilik quqyq buzýshylyq týraly kodeksiniń 204-2-babyna sáıkes, bazarlardy modernızatsııalamaý ákimshilik jaýapkershilikke ákep soǵatynyn habarlady. 2026 jylǵy 1 qańtardan bastap talaptardy oryndamaǵan bazarlardyń qyzmeti ýaqytsha toqtatylady.
Eske salaıyq, buǵan deıin Almatydaǵy Kók bazardy jańǵyrtý jumystary qalaı júrip jatqanyn jazǵanbyz.