2026 jyldan bastap alǵashqy áskerı daıyndyq sabaǵynyń oqytýshylaryna jańa talap qoıylady
ASTANA. KAZINFORM - Qorǵanys mınıstriniń tapsyrmasy boıynsha Abaı, Jambyl jáne Batys Qazaqstan oblystarynda alǵashqy áskerı daıyndyq oqytýshylaryna arnalǵan oqý-ádistemelik jıyndar ótti.
QR Qorǵanys mınıstrligi baspasóz qyzmetiniń habarlaýysha, is-sharalar Oqý-aǵartý mınıstrligimen jáne óńirlik bilim basqarmalarymen birlesip uıymdastyryldy.
Jıyndarǵa júzge jýyq alǵashqy áskerı daıyndyq oqytýshysy qatysty. Negizgi nazar áskerı-patrıottyq tárbıeniń zamanaýı talaptary men qazirgi qarýly qaqtyǵystar sıpatynyń ózgerýin eskere otyryp, áskerge deıingi jastardy daıarlaý mazmunyn jańartýǵa aýdaryldy.
Pedagogterge 2026 jylǵy 1 qyrkúıekten bastap kúshine enetin zańnamadaǵy jańartylǵan normalar tanystyryldy.
Qorǵanys mınıstrligi Áskerı bilim jáne ǵylym departamenti bastyǵynyń orynbasary maıor Lıýdmıla Perıakınanyń aıtýynsha, zańnamaǵa «áskerge deıingi daıarlyq» uǵymy engizilip, AÁD oqytýshylaryna áskerı qyzmet ótiliniń bolýy jóninde jańa talap qoıylǵan.
Onyń sózinshe, sabaqtar jańartylǵan oqýlyqtar boıynsha zamanaýı sımýlıatorlardy paıdalana otyryp ótkiziletin bolady. Oqý baǵdarlamasyna ushqyshsyz ushý júıeleri, qarý-jaraq pen áskerı tehnıkany qoldaný negizderi, oq-dáriler, medıtsınalyq jáne psıhologııalyq daıarlyq engizilgen.
Jıynǵa qatysýshylarmen praktıkalyq sabaqtardy qyzmettik tájirıbesi mol jáne zamanaýı áskerı-tehnologııalyq bilimdi jetik meńgergen Qurlyq áskerleriniń áskerı qyzmetshileri ótkizdi.
Jıyn baǵdarlamasy ózekti qaýip-qaterler men jastardy daıarlaýdyń zamanaýı tásilderin eskere otyryp jasaldy. Oqytýshylarǵa qazirgi qarýly qaqtyǵystardy júrgizý erekshelikteri, taktıkalyq jáne atys daıarlyǵy, ushqyshsyz ushý apparattaryn qoldaný jáne olarǵa qarsy is-qımyl tásilderi, jergilikti jerde baǵdarlaý, jeke qorǵanys quraldaryn paıdalaný, sondaı-aq taktıkalyq medıtsına elementteri tanystyryldy.
Uıymdastyrýshylar jastardyń boıynda joǵary azamattyq jaýapkershilik, patrıotızm jáne Otandy qorǵaýǵa daıyndyq qasıetterin qalyptastyrý máselelerine erekshe nazar aýdardy. Qorǵanys mınıstrliginde bolashaq áskerge shaqyrylýshylardy sapaly daıarlaý memleket, bilim berý uıymdary men azamattyq qoǵamnyń tyǵyz ózara is-qımyly arqyly ǵana múmkin ekeni atap ótildi.
Osyǵan deıin Qazaqstanda áskerı esepke alý júıesi zamanaýı formatqa kóshetini týraly jazdyq.
