2026 jyldan bastap áleýmettik aýdarym bereshegi 22 myń teńgeden asqandardyń esepshoty ǵana buǵattalady
ASTANA. KAZINFORM – Memlekettik kirister komıteti Aýdıt departamenti bereshekpen jumys basqarmasynyń basshysy Aryn Qaısar jańa Salyq kodeksinde áleýmettik aýdarym qaryzy úshin shot buǵattaý tártibi qalaı ózgeretinin túsindirdi.
- Ár jumys isteıtin adamnyń memlekettik zeınetaqy qoryna jınaıtyn aqshasy, áleýmettik saqtandyrý aýdarymdary bar. Onyń bári áleýmettik kodekspen retteledi. Ol jerde buǵattaý júrgiziletin shekti soma kórsetilmegen. 10 teńge me, 1000 teńge me, naqty aıqyndalmaǵan. Aýdarym ýaqytyly tólenbese, esepshoty buǵattalady. Basqasha aıtsaq, shyǵys operatsııasy toqtatylady. Al salyq bereshegi bolsa, bereshek somasyndaǵy aqshaǵa ǵana buǵattalady. 10 myń teńge salyq bereshegi bolsa, 10 myń teńge buǵattalady, 100 myń teńge qaryz bolsa, 100 myń teńgege buǵat qoıylady. Óıtkeni salyq kodeksinde naqty soma kórsetilgen. Áleýmettik kodekste ondaı soma kórsetilmegen, - dedi ol komıtettiń áleýmettik jelisi arqyly ótken onlaın baspasóz konferentsııada.
Aıtýynsha, 2026 jyldan bastap áleýmettik aýdarym bereshegi de salyq beresheginiń tártibimen qaıtarylady.
- Salyq reformasynyń aıasynda Áleýmettik kodekstiń osy tusyn da ózgerttik. 2026 jyldyń 1 qańtarynan bastap qazirgideı 1 teńge áleýmettik aýdarym qaryzy bolsa da esepshotyn buǵattamaımyz. 6 aılyq eseptik kórsetkish degen naqty somany qoıyp otyrmyz. Áleýmettik aýdarym bereshegi 6 AEK-ten, 21 700 teńgeden assa ǵana esepshot buǵattalady. Onyń ústine áleýmettik aýdarym qaryzynyń somasy kóleminde ǵana aqsha buǵattalady. Biraq bul 2026 jyldyń 1 qańtarynan keıin qalyptasqan bereshekterge ǵana júredi. Al qazir bereshegi úshin buǵattalǵan shottar 2026 jyly buǵattaýdan bosatylady dep túsinbeý kerek, - dedi Aryn Qaısar.
Eske salsaq, Memleket basshysy Qasym-Jomart Toqaev bıylǵy Joldaýynda salyq bereshegi barlardyń banktegi esepshotyn tolyq buǵattamaýdy tapsyrǵan bolatyn.
- Bereshek somasy tym kóp bolǵan jaǵdaıda, kepilge múlik qoıýdy talap etpeı, qaryzdy bólip tóleýge múmkindik bergen jón. Josparǵa saı tekserý tásilinen birjola bas tartýǵa tyrysý kerek, - degen edi Prezıdent.