2026 jyldan bankter aýyl sharýashylyǵyna jeńildetilgen nesıe berýge tartylady
ASTANA. KAZINFORM — 2026 jyldan qaıta óńdeý kásiporyndarynyń aınalym qarajatyn tolyqtyrýǵa ekinshi deńgeıli bankter tartylady. Bul týraly Aýyl sharýashylyǵy mınıstrliginen málim etti.
— Agrarlardy qoldaý maqsatynda qaıta óńdeý kásiporyndarynyń aınalym qarajatyn tolyqtyrý úshin qarjy ınstıtýttaryn tikeleı sýbsıdııalaý mehanızmi iske qosyldy. Bul mehanızm aıasynda qarjy ınstıtýttary kommertsııalyq qarajat tartý kezeńinde syıaqy mólsherlemesin tómendetedi. Al agroónerkásip kesheni sýbektilerine nesıe jyldyq 5 paıyzdan aspaıtyn mólsherlememen beriledi. Aýyl sharýashylyǵy mınıstrligi qarjy ınstıtýttaryna osy aıyrmany tikeleı sýbsıdııalaıdy. Bul sýbsıdııalaý protsesin bıýrokratııasyzdandyryp, myńdaǵan fermer men 20 aýdandyq basqarmanyń qatysý qajettiligin boldyrmaıdy. Sonymen qatar sybaılas jemqorlyq táýekelderin tómendetip, bıýdjet qarajatyn tıimdi paıdalanýǵa múmkindik beredi, — dep atap ótedi mınıstrlikten agenttik saýalyna oraı.
Vedomstvo málimetinshe, osy maqsatqa respýblıkalyq bıýdjetten 7,7 mlrd teńge sýbsıdııa qarastyrylǵan. Máselen, «Agrarlyq nesıe korporatsııasy» AQ arqyly qaıta óńdeý kásiporyndaryna aınalym qarajatyn tolyqtyrý úshin 44,3 mlrd teńgeden astam jeńildetilgen nesıe beriledi.
— Al 2026 jyldan bastap, bıýdjetten qarajat bólinýine qaraı bul protseske ekinshi deńgeıli bankter de tartylatyn bolady. Sonymen qatar búginde «Agrarlyq nesıe korporatsııasy» AQ bordaqylaý alańdarynyń aınalym qarajatyn jeńildetilgen nesıeleýge arnalǵan qarajat tartý jumystaryn júrgizip jatyr. Bul qarajattar túpkilikti qaryz alýshylarǵa jyldyq 5 paıyz syıaqy mólsherlemesimen qoljetimdi bolady. Mal sharýashylyǵy baǵytyndaǵy qojalyqtardyń nesıelik qoljetimdiligin arttyrý maqsatynda «Damý» kásipkerlikti damytý qory» AQ arqyly kepildendirý mehanızmi iske asyrylady. Osylaısha, kepil múlki jetkiliksiz fermerlerge nesıeler boıynsha kepildik berý kózdelýde, — dedi mınıstrlikten.
Aıta keteıik, 2024 jyldyń qarashasynda ótken Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev agroónerkásip keshenin memleket tarapynan sýbsıdııalaýdy birtindep qysqartyp, onyń ornyna bankterdiń aýyl sharýashylyǵyna jeńildetilgen nesıe berýin yntalandyrýdy tapsyrǵan edi.