2026 jyldan azot totyǵyn zańsyz paıdalanýdy anyqtaý úshin tekserý júrgiziledi
ASTANA. KAZINFORM – 2026 jyldan bastap azot totyǵyn zańsyz paıdalanatyndardy anyqtaý úshin mekemelerde tekserý júrgiziledi. Bul jaıynda Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
— 2023 jyldan bastap azot totyǵy adam ómiri men densaýlyǵyna zııandy áserin tıgizetin, kúshti áser etetin zattardyń tizbesine engizilgen. Búginde kúshti áser etetin zattardyń zańsyz aınalymy jáne olarmen jumys isteý qaǵıdalaryn buzǵany úshin qylmystyq jaýapkershilikke tartýǵa qatysty Zań («Qazaqstan Respýblıkasynyń keıbir zańnamalyq aktilerine esirtki, psıhotroptyq zattardyń, sol tektesterdiń, prekýrsorlardyń jáne kúshti áser etetin zattardyń zańsyz aınalymyna qarsy is-qımyl máseleleri boıynsha ózgerister men tolyqtyrýlar engizý týraly» Zańy) qabyldanǵan. Ol 2026 jylǵy 1 qańtardan bastap kúshine enedi. Osylaısha, qoldanystaǵy zańnama aıasynda azot totyǵynyń zańsyz aınalymy úshin qylmystyq jáne ákimshilik jaýapkershilik sharalary qarastyrylǵan, — dedi Úkimet basshysy jaýabynda.
Onyń atap ótýinshe, 2026 jyldan bastap quqyq qorǵaý organdarynyń jedel izdestirý is-sharalary aıasynda azot totyǵyn zańsyz paıdalaný turǵysynan mekemelerdi tekserý júzege asyryldy.
— Qazirgi ýaqytta óńirlerde halyqpen esirtkige qatysty quqyq buzýshylyqtarǵa múldem tózbeýshilik kózqarasyn qalyptastyrý jáne qabyldanǵan Zańnyń novellalary boıynsha túsindirý jumystary belsendi júzege asyrylýda, — dedi Oljas Bektenov.
Buǵan deıin Qyzylorda oblysynda polıtseıler túngi klýbta adamdy eseńgiretetin azot oksıdin satý deregin anyqtaǵanyn jazǵan edik.