2026 jyl Tsıfrlandyrý jáne jasandy ıntellekt jyly dep atalady — Memleket basshysy

ASTANA. KAZINFORM — 2026 jyl Tsıfrlandyrý jáne jasandy ıntellekt jyly dep atalady. Bul týraly Qazaqstan halqyn Jańa jylmen quttyqtaǵan Memleket basshysy Qasym-Jomart Toqaev aıtty.

— 2026 jyly Qazaqstan jańǵyrýdyń jańa kezeńine qadam basady. Elimizdiń jarqyn keleshegi úshin aldaǵy konstıtýtsııalyq reformanyń mán-mańyzy zor. Azamattarymyz Qazaqstannyń ósip-órkendeýine tyń serpin beretin bul reformany qoldaıdy dep senemin.

Biz energetıkalyq áleýetimizdi nyǵaıtyp, agroónerkásip kesheni, sý sharýashylyǵy máselelerin sheship, kólik-logıstıka salasyn jáne turǵyn úı-kommýnaldyq sharýashylyǵynyń ınfraqurylymyn damyta beremiz, — dedi Memleket basshysy.

Prezıdenttiń atap ótýinshe, shaǵyn jáne orta bıznes árdaıym memlekettiń nazarynda bolady. Barlyq óńirde jańa kásiporyndar ashylyp, joldar jóndeledi, sondaı-aq turǵyn úıler, mektepter, densaýlyq saqtaý, sport jáne mádenıet nysandary boı kóteredi.

— Men bıylǵy Joldaýymda Tsıfrlyq memleket bolýymyz kerektigin jarııaladym. Sondyqtan kelesi jyldy Tsıfrlandyrý jáne jasandy ıntellekt jyly dep ataý týraly sheshim qabyldadym. Ozyq tehnologııalar elimizdiń barlyq saladaǵy áleýetin arttyrýǵa jol ashpaq, — dedi Qasym-Jomart Toqaev.

Memleket basshysy «Ulttyq qor — balalarǵa» bastamasy aıasynda ár balanyń esepshotyna úshinshi jyl qatarynan qarajat túsetinin atap ótti.

— Óskeleń urpaqqa qamqorlyq kórsetý – basty mindetimiz. Meniń bastamammen júzege asyrylyp jatqan «Ulttyq qor – balalarǵa» jobasy aıasynda osymen úshinshi jyl qatarynan ár balanyń esepshotyna qarajat túsedi. Memleket óziniń áleýmettik mindettemelerin oryndaı beredi. Biz bilim berý jáne densaýlyq saqtaý salalaryn damytýǵa árdaıym aıryqsha nazar aýdaramyz, — dedi Prezıdent.

Aıta keteıik, buǵan deıin Memleket basshysy Qazaqstan halqyn Jańa jylmen quttyqtaǵanyn habarlaǵan edik.