2026 jyl tarıhtaǵy eń ystyq jyldardyń biri bolýy múmkin
ASTANA. KAZINFORM – Eýropalyq Copernicus klımattyq monıtorıng baǵdarlamasynyń málimetinshe, 2026 jyl meteorologııalyq baqylaý tarıhyndaǵy eń ystyq ekinshi jyl bolýy múmkin. Bul týraly uıymnyń 6 qarashada jarııalanǵan aı saıynǵy esebinde aıtylǵan, dep habarlaıdy DW.
Ǵalymdar 2026 jyldyń tarıhtaǵy eń ystyq jyl ataný yqtımaldyǵyn 20 paıyzǵa baǵalap otyr. Qazirgi rekord 2024 jylǵa tıesili.
Al bıylǵy qazan aıy baqylaý tarıhyndaǵy eń ystyq qazan retinde tirkeldi. Álem boıynsha ortasha temperatýra 15,35 gradýsqa jetip, ındýstrııaǵa deıingi kezeńmen salystyrǵanda 1,75 gradýs joǵary boldy.
Osylaısha Parıj klımattyq kelisiminde belgilengen 1,5 gradýstyq uzaq merzimdi shekten aılyq temperatýra kórsetkishi qatarynan úshinshi aı asyp otyr.
Copernicus derekterine sáıkes, qazanda Dúnıejúzilik muhıt sýynyń temperatýrasy da ádettegiden joǵary bolǵan. Polıarlyq aımaqtardy eseptemegende, muhıt betiniń ortasha temperatýrasy 20,95 gradýsqa jetti. Bul – qazan aıy úshin tirkelgen eń joǵary kórsetkish.
Temperatýranyń kóterilýine Tynyq muhıtynyń ekvatorlyq bóligindegi sý betiniń jylynýymen baılanysty El-Nıno qubylysy da áser etken.
– 2026 jyl jahandyq jylyný deńgeıi 1,5 gradýstan asqan ekinshi jyl bolýy múmkin, – dedi Eýropalyq orta merzimdi aýa raıyn boljaý ortalyǵynyń ókili Samanta Berdjes.
Ǵalymdar sońǵy tórt jyldaǵy ortasha temperatýranyń da ındýstrııaǵa deıingi kezeńmen salystyrǵanda 1,5 gradýstan astam joǵary bolýy múmkin ekenin joqqa shyǵarmaıdy.
Bıyl Eýropanyń birqatar elinde jazǵy aptap ystyq pen qurǵaqshylyq temperatýralyq rekordtarǵa ákeldi. Sonyń saldarynan Reın, Dýnaı jáne Vısla ózenderindegi sý deńgeıi tómendedi.
Al keıbir memleketter kerisinshe nóser jaýyn men sý tasqynynan zardap shekti.
2015 jyly BUU aıasynda qabyldanǵan Parıj klımattyq kelisimi parnıktik gazdar shyǵaryndylaryn qysqartýdy jáne jahandyq jylynýdy shekteýdi kózdeıdi.
Qujatqa sáıkes, álemdegi ortasha temperatýranyń ósýin ındýstrııaǵa deıingi kezeńmen salystyrǵanda 2 gradýstan edáýir tómen deńgeıde ustap, ony 1,5 gradýspen shekteýge kúsh salý qajet.
Degenmen BUU baǵalaýynsha, jahandyq temperatýranyń 1,5 gradýstyq shekten ýaqytsha asýyn boldyrmaý barǵan saıyn qıyndap barady.
Aıta keteıik, buǵan deıin BUU jahandyq jylynýdyń Parıj kelisiminde belgilengen 1,5 gradýstyq mejeden asý qaýpi týraly eskertken bolatyn. Sarapshylar klımattyq qaterlerdi azaıtý úshin parnıktik gazdar shyǵaryndylaryn shuǵyl qysqartý qajettigin atap ótti.