2026 jyl «Ortalyq Azııa men Italııanyń» mádenı qozǵalys jyly bolady
ASTANA. KAZINFORM – Memleket basshysy Qasym-Jomart Toqaev 2026 jyly «Ortalyq Azııa men Italııanyń» mádenı qozǵalys jyly retinde atap ótýdi usyndy.
– Mádenı ózara yqpaldastyqqa kelsek, saladaǵy qarym-qatynastyń qarqyndy damyp kele jatqanyn atap ótkim keledi. Bul halyqtar men elder arasyndaǵy dostyq pen ózara túsinistikti nyǵaıtýdyń negizgi faktory. Gýmanıtarlyq baılanysty odan ári damytý úshin 2026 jyly Ortalyq Azııa men Italııanyń mádenı qozǵalys jyly aıasynda birqatar birlesken is-shara ótkizýdi usynamyz, - dedi Qasym-Jomart Toqaev elordada ótip jatqan «Ortalyq Azııa – Italııa» birinshi sammıtinde.
Prezıdenttiń aıtýynsha, sammıtinde kóterilgen bastamalar birlesken qadamnyń negizi.
– Men usynǵan bastamalar Qazaqstannyń nyǵaıýy, elderimiz arasyndaǵy dostyqty bekemdeý jáne yntymaqtastyqty keńeıtý, bultartpas úderis ekenin dáleldeıdi dep esepteımin. Búgin aıtylǵan barlyq usynys osy baǵyttaǵy birlesken qadamdarymyzdyń negizi bolaryna senim mol, - dedi Memleket basshysy.
Aıta keteıik, elordada «Ortalyq Azııa – Italııa» birinshi sammıti ótip jatyr. Oǵan Qazaqstan Prezıdenti Qasym-Jomart Toqaev, Italııa Mınıstrler Keńesiniń tóraǵasy Djordja Melonı, Qyrǵyzstan prezıdenti Sadyr Japarov, Ózbekstan prezıdenti Shavkat Mırzıeev, Túrikmenstan prezıdenti Serdar Berdimuhamedov, Tájikstan prezıdenti Emomalı Rahmon qatysyp jatyr.