2026 jyl basynan 163 myńnan astam adamǵa ataýly áleýmettik kómek kórsetildi

ASTANA. KAZINFORM – 2026 jylǵy 1 naýryzdaǵy jaǵdaı boıynsha ataýly áleýmettik kómek (budan ári – AÁK) 30,3 myń otbasyndaǵy  163,3 myń adamǵa 5,2 mlrd teńge somasynda taǵaıyndaldy. Bıyl bul maqsattarǵa bıýdjetten 62,7 mlrd teńge qarastyrylǵan. Bul týraly Eńbek jáne halyqty áleýmettik qorǵaý mınıstrligi habarlady. 

Buryn habarlanǵandaı, AÁK-niń negizgi maqsaty – aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.

AÁK mynalardy kózdeıdi:

– tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;

– tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem berý. Aǵymdaǵy jyldyń naýryzyna AÁK alýshylar qatarynan mektep jasyna deıingi 50,1 myń balaǵa 618,1 mln. teńge somasyna qosymsha tólem taǵaıyndaldy;

– jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.

Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha mansap ortalyǵynda, aýyl okrýginiń ákimine sondaı-aq Elektrondyq úkimet portaly (egov.kz) arqyly bere alady.

Budan buryn elde 138 myńnan astam adamǵa ataýly áleýmettik kómek kórsetilgenin jazǵanbyz.