2026 bastap barlyq ákimshilik aıyppul óńirlerge beriledi
ASTANA. KAZINFORM – Kelesi jyly ortalyqtan óńirlerge salyqtardyń, tólemderdiń jekelegen túrleri jáne barlyq ákimshilik aıyppul beriledi. Bul týraly Aýyl ákimderiniń dıalog-platformasynda Premer-mınıstrdiń orynbasary Qanat Bozymbaev aıtty.
- Óńirlerdiń qarjylyq derbestigin nyǵaıtý maqsatynda respýblıkalyq bıýdjetten jergilikti bıýdjetterge qosymsha kiris kózderin berý jalǵasyp jatyr. Bul sońǵy bes jylda jergilikti bıýdjet kiristerin 3,1 trln teńgeden 7,9 trln teńgege deıin aıtarlyqtaı ósýine alyp keldi. Kelesi jyldan bastap ortalyqtan óńirlerge salyqtardyń, tólemderdiń jekelegen túrleri jáne barlyq ákimshilik aıyppul beriletin bolady, - dedi ol.
Sondaı-aq vıtse-premer úshinshi deńgeıdegi bıýdjetke jeke tabys salyǵy, shaǵyn jáne orta bıznesten korporatıvtik tabys salyǵy beriletinin aıtty.
- Nátıjesinde, jergilikti bıýdjet kiristeriniń 70 paıyz aýdandyq jáne oblystyq mańyzy bar qalalar bıýdjetterinde qalyptasady. Atalǵan barlyq ózgeris aıasynda óńirlerge 500 mlrd teńgeden astam qarjy qosymsha túsedi, - dedi Qanat Bozymbaev.
Bozymbaev óńirler arasyndaǵy ınfraqurylymdyq alshaqtyqty qysqartatyn sharalardy atady.