2026-2028 jyldary elimizdiń 100 myń sharshy shaqyrym aýmaǵy zertteledi

ASTANA. KAZINFORM — El aýmaǵynyń geologııalyq-geofızıkalyq zerttelýi 2 mln 200 myń sharshy shaqyrymǵa deıin keńeıtiledi. Bul týraly Úkimet otyrysynda Ónerkásip jáne qurylys vıtse-mınıstri Iran Sharhan aıtty.

— Prezıdent tapsyrmasy boıynsha kelesi jyly el aýmaǵynyń geologııalyq-geofızıkalyq zerttelýin 2 mln 200 myń sharshy shaqyrymǵa deıin keńeıtý kózdelgen. Búginde 2 mln 14 myń sharshy shaqyrym aýmaq zerttelip otyr. Jyl sońyna deıin bul kólem 2 mln 38 myń sharshy shaqyrymǵa deıin ulǵaıtylady. Perspektıvaly ýchaskelerdi erte anyqtaý jáne barlaý tıimdiligin arttyrý maqsatynda zertteý jumystary neǵurlym naqty masshtabta, ıaǵnı 1-50 000 masshtabynda júrgizilmek, — dedi vıtse-mınıstr.

Onyń aıtýynsha, atalǵan tásil boıynsha 2026-2028 jyldary 100 myń sharshy shaqyrym aýmaq zertteledi. Odan keıin jyl saıyn 30 myń sharshy shaqyrym zertteý josparlanǵan.

— Jumysty jedeldetý úshin 20 jobalyq-smetalyq qujattamany ázirleýge Úkimet rezervinen 240 mln teńge bólinip, geologııalyq túsirýdiń jańa standarttary bekitildi. Atalǵan jumystardy Ulttyq geologııalyq qyzmet, «Tsentrgeolsemka», Satbaev atyndaǵy Ǵylym‑tehnologııalyq ınstıtýt jáne tájirıbeli mamandardan quralǵan konsortsıým birlesip júzege asyrýda. Jumys barysynda «Taý‑Ken Samuryq» qatysýymen áýe-geofızıkalyq, geohımııalyq jáne tsıfrlyq tehnologııalar qoldanylatyn bolady. Kelesi jylǵa keshendi zertteý men seısmo-barlaýǵa shamamen 44 mlrd teńge qarastyryldy, — dedi ol.

Aıta keteıik, Úkimet otyrysynda geologııa jáne jer qoınaýyn paıdalaný salasyn damytý, tsıfrlandyrý sharalary, sonymen qatar halyqty dári-dármekpen qamtamasyz etý máselesi pysyqtalyp jatyr.