2026-2027 oqý jylyna 90 myńǵa jýyq grant bólindi — Saıasat Nurbek
ASTANA. KAZINFORM — 2026–2027 oqý jylyna joǵary bilimdi kadrlardy daıarlaýǵa arnalǵan memlekettik bilim berý tapsyrysynyń kólemi ótken jyldar deńgeıinde saqtalady.
Bul týraly Úkimet otyrysynda QR Ǵylym jáne joǵary bilim mınıstri Saıasat Nurbek málim etti. Mınıstrdiń aıtýynsha, aldaǵy oqý jylyna jalpy sany 89 457 memlekettik grant bólingen. Onyń ishinde 75 371 grant bakalavrıatqa, 11 007 grant magıstratýraǵa jáne 3 079 grant doktorantýraǵa qarastyrylǵan.
— Memlekettik bilim berý tapsyrysyn qalyptastyrý barysynda el ekonomıkasynyń 2030 jylǵa deıingi kadrlarǵa degen qajettiligi eskerilgen. Boljamǵa sáıkes, Qazaqstanda 883 myńnan astam mamanǵa suranys bolady. Onyń ishinde shamamen 530 myńy ınjenerlik-tehnıkalyq baǵyttaǵy kadrlar bolsa, 185 myńnan astamy pedagogıkalyq salaǵa tıesili. Al 168 myńǵa jýyǵy ózge salalardyń mamandary bolmaq, — dedi ol.
Osyǵan baılanysty granttardy bólýde ınjenerlik, IT, agrarlyq, pedagogıkalyq jáne jaratylystaný baǵyttaryna basymdyq berilgen. Atap aıtqanda, memlekettik granttardyń 60 paıyzy ınjenerlik-tehnıkalyq, aqparattyq tehnologııalar jáne aýyl sharýashylyǵy mamandyqtaryna baǵyttalǵan. Sonymen qatar 21 paıyzy pedagogıkalyq kadrlardy daıarlaýǵa bólindi.
Buǵan deıin Azamattyq avıatsııa akademııasyna bólinetin grant sany artqanyn jazǵanbyz.
