2025–2030 jyldary elimizde túrli salada 1,6 mln maman qajet bolady
ASTANA. KAZINFORM – Aldaǵy 5 jylda elimizde túrli salada 1,6 mln maman qajet bolady. Bul týraly Eńbek resýrstaryn damytý ortalyǵynyń Kazinform joldaǵan resmı saýalǵa jaýabynda jazylǵan.
Sarapshylardyń aıtýynsha, Qazaqstanda 2025–2030 jyldary qajet bolatyn 1,6 mln kadrdyń ishine joǵary, orta, arnaıy bilimi bar mamandar, basshylar jáne arnaıy biliktiligi joq jumysshylar enedi.
Ásirese esepshiler, kúzetshiler, satýshylar, júrgizýshiler jáne orta mektep muǵalimderine suranys joǵary bolady. Sebebi bular — eńbek naryǵyndaǵy eń aýqymdy bólikti alyp jatqan mamandyqtar.
— Elimiz atalǵan kezeńde tehnıkalyq jáne kásiptik bilimi bar jumysshylar tapshylyǵyn sezinýi múmkin. Ol jalpy eńbek naryǵyndaǵy suranystyń teń jartysynan asady (55%) – 875 myń adam. Ekinshi orynda joǵary bilimi bar jumysshy mamandar (27%) tur – 429 myń adam. Qurylys salasynda da kadrǵa joǵary suranys bolady dep boljanady – 100 myń adam. Ol jumysshy mamandardyń jalpy sanynyń 25%-yn quraıdy. Budan bólek aýyl sharýashylyǵy (13%), óńdeý ónerkásibi (12%) jáne kólik salasynda (10%) suranys artatyny baıqalady, - delingen habarlamada.
Aıta keteıik, buǵan deıin elimizde 2025 jyly joǵary suranysta bolatyn jumysshy mamandyqtardyń TOP-10 tizimin jarııalaǵan edik.